ने. सं. ११४४ ञलाथ्व नवमी -

लुम्बिनीया बौद्ध सम्पदा संरक्षणया निंतिं म्याराथुन

येँ – लुम्बिनीइ च्वंगु बौद्ध सम्पदाया संरक्षण व प्रवद्र्धन यायेगु उद्देश्यं लुम्बिनी शान्ति म्याराथुन जुइगु जूगु दु । विश्व शान्तिया अग्रदूत महामावन भगवान गौतम बुद्धया जन्मस्थल लुम्बिनी व उकिया जःखः न्यनाच्वंगु बौद्ध सम्पदाया संरक्षण व प्रवद्र्धन यायेगु ल्याखं उगु म्याराथुन यायेत्यंगु खः । लुम्बिनी पीस म्याराथुन एडभेन्चर स्पोर्टस् नेपालया ग्वसालय् लुम्बिनी क्षेत्रयात विश्वन्यंकभनया बौद्ध धर्मावलम्बितय् मुख्य तीर्थस्थलया रुपय् विकास व प्रवद्र्धन यायेगु ल्याखं जुइगु लुम्बिनी शान्ति म्याराथुन थ्व हे वइगु होलिपुन्हि कुन्हु जुइ ।

थुगु ज्याझ्वलं लुम्बिनीयात उकथं तीर्थस्थलया रुपय् विकास यायेत व उकिया प्रवद्र्धन यायेत महत्वपूर्ण भूमिका म्हितीगु विश्वास ग्वसाः खलकं काःगु दु । उगु म्याराथुनया रेस डाइरेक्टर नेपाःया नांजाःम्ह कीर्तिमानी म्याराथुन धावक बैकुण्ठ मानन्धरं लुम्बिनी शान्ति म्याराथुनं लुम्बिनी क्षेत्रय् अझ अप्वः पर्यटक दुकायेत सहयोगी भूमिका म्हिती धयादीगु दु । नेपाःलिसें भारत, चीन, अस्टे«लिया लगायत विश्वया थीथी देय्या निसःत्या स्वयां अप्वः धावकं ब्वति काइगु ग्वसाः खलःया अनुमान दु । उगु म्याराथुन स्वंगू विधाय् जुइगु ग्वसाः खलकं धाःगु दु ।

मुक्कं ४२ किलोमीटरया फुल म्याराथुन, २१ किलोमीटरया हाफ म्याराथुन व न्यागू किलोमीटरया ब्वाज्या यानाः स्वंगू विधाय् म्याराथुन यायेगु तयारी जुयाच्वंगु दु । फुल म्याराथुनय् न्हाप जूम्हेसित छगू लाख तकाया लुम्बिनी अशोक पुरस्कार, लिउ लाःम्हेसित न्हय्न्याद्वः तकाया कपिलवस्तु हुएन सान पुरस्कार व लियांलिउयात न्यय्द्वः तकाया मायादेवी गार्डेन उथान्त पुरस्कार नापं दसिपौ बीगु जूगु दु । अथे हे हाफ म्याराथुनय् नं न्हाप, लिउ व लियांलिउयात न्यय्द्वः, स्वीन्याद्वः व नीन्याद्वः तका दां पुरस्कार बी ।

मायादेवीं सिद्धार्थ गौतमयात जन्म बी धुंकाः थःगु दरवार तिलौराकोट लिहां वःगु लँपुयात मायादेवी थः प्वाथय् दुगु लँया रुपय् विकास यायेगु व उगु थासय् पर्यटन बजाः प्रवद्र्धन यायेगु योजना दुगु ग्वसाः खलकं धाःगु दु ।