ने. सं. ११४४ कछलागा षष्ठी -

न्हूगु शहर हचुवाया योजना

शहर दयेकी धाःगु लागाय् जग्गा दलालत सक्रिय

येँ – येँ देशय् न्हूगु प्यंगू शहर दयेकेगु धकाः उपत्यका विकास प्राधिकरणं हःगु योजना हचुवां तयार याःगु जुयाः आः तक छुं हे ज्या याये मफयाच्वंगु खँ सीदुगु दु । प्राधिकरणया प्रमुख भाइकाजी तिवारीं गर्वपूर्वक न्ह्यःने हःगु थ्व योजना बारे आः तक छुं हे विस्तृत अध्ययन मयाःगु व छुं अध्ययन बिना हे योजना बारे सार्वजनिक जानकारी बिउगु कारणं न्हूगु शहर दयेकी धाःगु लागाय् आः जग्गा दलालतय्सं प्रशस्त जग्गा न्यानाः पूरा योजनायात हे प्रभावित याइगु अवस्थाय् थ्यंगु खँ सीदुगु दु ।

शहरी योजनाविद् महेन्द्र सुब्बां बीबीसी नेपाली सेवालिसे खँ ल्हासें प्राधिकरणं थज्याःगु योजना सञ्चालन यायेगु सम्भव जुइगु खः लाकि मखु धइगु तकं अध्ययन मयासें सार्वजनिक जानकारी बियाः गलत याःगु बिचाः तयादीगु दु । वय्कलं स्वनिगः थेंज्याःगु आपालं सांस्कृतिक सम्पदा दुगु लागाय् थप न्हूगु शहर दयेके फइ लाकि फइ मखु धइगु खँया ‘डिटेल’ अध्ययन तकं मयासे न्हूगु शहर निर्माण जुइगु थाय् समेत तोके यानाः सार्वजनिक याःगु पाय्छि मजूगु खँ नं कनादिल ।

वय्कलं धयादी, ‘जनतायात प्रत्यक्ष लिच्वः लाकीगु थज्याःगु खँ विस्तृत अध्ययन मयासे सार्वजनिक याये मजिउ ।’वय्कलं आः चर्चाय् वःगु योजनाया स्केल तसकं तःधं जूगु कारणं डिटेल अध्ययन यायेबलय् उकिया स्केल चीधं याये मालेफुगु बिचाः नं प्वंकादिल । सरकारं येँया निगू, यलया छगू व ख्वपया छगू थासय् न्हूगु शहर दयेकेगु धकाः जग्गा समेत अधिग्रहण यानाः कयातःगु दु ।

उगु थासय् जग्गा न्याये मीगु ज्या तकं आः पना तःगु दु । तर उगु लागाय् सरकारं जग्गा न्याये मीगु ज्या पनातःसां जग्गा दलालतय्सं धाःसा जःखः लागाया जग्गा न्यानाः स्थानीय वासिन्दायात अनं विमुख जुइ मालीगु अवस्थाय् थ्यंका तयेधुंकूगु दु । थुकिं यानाः नं आः योजना न्ह्याके थाकुइगु अनुमान जुयाच्वंगु दु ।

थप २० लाख जनसंख्या वइगु
उपत्यका प्राधिकरणं स्वनिगः दुने न्हूगु प्यंगू शहर दयेके धकाः हःगु थ्व योजनां येँय् दुने मेगु २० लाख जनसंख्या थपे याइगु अनुमान जुयाच्वंगु दु । प्राधिकरणं नं स्वनिगः दुने जनसंख्या थपे यानाः व्यवस्थित शहरीकरण यायेगु ताः तयाः हे थ्व योजना हयागु खँ धाःगु दु । थुकिया लागिं करिब डेढ लाख रोपनी जग्गा अधिग्रहण यानाः कया तयेधुंकूगु दु ।

तर शहरी विकासया विज्ञतय्सं धाःसा स्वनिगः दुने आः थप जनसंख्या च्वने फइगु अवस्था मदयेधुंकूगु खँ धयाहःगु दु । थन आः दुगु जनसंख्या हे अप्वः जुइधुंकूगु कारणं थप मनू च्वनेगु लागिं मेगु पूर्वाधार प्रयाप्त मजूगु खँ धयाहःगु दु । लिसें देशय् संघीय व्यवस्था वयेधुंकाः सम्बन्धित प्रदेशं थःत माःगु विकास मयासे केन्द्रपाखें शहर निर्माण थेंज्याःगु योजना थोपरे यायेगु पाय्छि मजूगु तर्क नं तयाहःगु दु ।