प्रधानन्यायाधीशयात बिदाय् च्वनेत सुझाव

येँ -सर्वोच्च अदालतया विवादयात कयाः म्हिगः सत्तारुढ दलया बैठक च्वंगु दु । सत्तारुढ दलया शीर्ष नेतातय् बैठकं प्रधानन्यायाधीश चालेन्द्र शम्शेर जबरा बिदाय् च्वनाः कार्यवाहक प्रधानन्यायाधीश क्वःछित नं सुझाव बिउगु दु । म्हिगः प्रधानमन्त्री निवास बालुवाटारय् च्वंगु बैठकय् ताः इलंनिसे अदालत अवरोध जूगु व प्रधानन्यायाधीश जबरा म्हमफुगुलिं यानाः तत्काल कार्यवाहक क्वःछिनाः अदालतया ज्या न्ह्याकेगु सुझाव बिउगु खः ।

संविधानया धारा १२९ (६)य् प्रधानन्यायाधीशया पद रिक्त जुल धाःसा वा प्रधानन्यायाधीश थःगु पदय् ज्या यायेत असमर्थ जुल धाःसा वा बिदाय् च्वनाच्वन वा नेपाः पिहां वंगु कारणं प्रधानन्यायाधीश सर्वोच्च अदालतय् उपस्थित जुइ मफइगु अवस्था वल धाःसा वरिष्ठटम न्यायाधीशं कायममुकायम प्रधानन्यायाधीश जुयाः ज्या यायेफइगु व्यवस्था दु । म्हिगःया बैठकय् प्रधानमन्त्री शेरबहादुर देउवा, माओवादी केन्द्रया अध्यक्ष पुष्पकमल दाहाल, नेकपा एकीकृत समाजवादीया अध्यक्ष माधव नेपाल, जनता समाजवादी पार्टीया उपाध्यक्ष उपेन्द्र यादव व राष्ट्रिय जनमोर्चाया दुर्गा पौडेलपिंसं ब्वति काःगु खः ।

प्रधानन्यायाधीश जबरा कोरोना भाइरस संक्रमण जुयाः वंगु सोमवाः निसें अस्पतालय् भर्ना जुयाच्वंगु दु । बुधवाः न्हापांखुसी सर्वोच्च अदालतय् गोला प्रक्रियां क्वःछिउगु इजलास पूर्ण रुपं सञ्चालन जुइ मफुत । प्रधानन्यायाधीश जबरां कायममुकायम क्वःछिमाः धासें कानुन व्यवसायी विरोध यायेवं इजलास प्रभावित जूगु खः ।

थ्वहे झ्वलय् प्रधानन्यायाधीश जबरां थः विदाय् मच्वनेगु खँ धाःगु दु । प्रधानन्यायाधीश जबरां थः थौं अस्पतालं छेँय् लिहां वनेगु धासें न्यायाधीशपिंत बिदाय् मच्वनेगु जानकारी याकूगु खः । सर्वोच्च अदालतया न्यायाधीशपिनिगु भेलाय् न्यायाधीश हरिकृष्ण कार्की लिसे टेलिफोनय् खँ ल्हासें जबरां थःगु स्वास्थ्य सुधार जूगुलिं छेँय् लिहां वनेगु जानकारी बिउगु खः ।

म्हिगः सर्वोच्च अदालतया न्यायाधीशतय्सं नेपाल बार एसोसिएसन व सर्वोच्च बार एसोसिएसनया पदाधिकारीत लिसे नं सहलह ब्याकूगु खः । सहलहया झ्वलय् संविधानया धारा १२९ या उपधारा ६ कथं प्रधानन्यायाधीशं थम्हं ज्या यायेमफइगु अवस्था वल धाःसा स्वतः वरिष्ठतम न्यायाधीश कामू प्रधानन्यायाधीश जुइगु व्यवस्था दुगु धासें उगु भूमिका म्हितेत वरिष्ठतम न्यायाधीश दिपक कार्कीयात इनाप याःगु खः ।

सम्बन्धित बुखँ

LEAVE YOUR COMMENTS