प्रदेश राजधानी बारे मेम्ह सांसद नं खुले जुल

येँ – ३ नम्बर प्रदेशया राजधानीयात कयाः प्रदेशया मेम्ह मन्त्रीं नं म्हुतुप्वाः चायेकूगु दु । प्रदेशया सामाजिक विकास मन्त्री युवराज दुलालं स्थायी राजधानी गन तयेगु धइगु निर्णय प्रदेश सभां निर्णय यायेमाःगु खँ कनादीगु दु । वय्कलं हेटौंडा अस्थायी राजधानी जक खः धासें स्थायी राजधानी हेटौंडां मेथाय् वनी मखु धकाः मुख्यमन्त्री डोरमणि पौडेलं धायेगु यानाच्वंसां नं उकिया निर्णय यायेगु अधिकार धाःसा प्रदेश सभां जक याइ धयादिल ।

वय्कलं आः राजधानीया लागिं प्रस्ताव याना तःगु न्यागू थाय् मध्ये काभ्रे हे पाय्छिगु थाय् खः धासें म्हिगः दोलखा व रामेछापया मनूतय्सं येँय् वयाः सेवा सुविधा कायेगु यानाच्वंगु खःसा थौं व स्वयां नं तापाक वनेमाःगु अवस्था वयाच्वन धयादिल । थुकिं यानाः जनतायात झन जक समस्या जुयाच्वन धासें हेटौंडा राजधानी मखु व ला राजधानी घोषणा मयाः तकया निंतिं अस्थायी कार्य सञ्चालन यायेगु थाय् जक खः धयादिल ।

मुख्यमन्त्री डोरमणि पौडेलं धाःसा ३ नम्बर प्रदेशया स्थायी राजधानी हेटौंडाय् हे तयेगु निंतिं थःगु जोड बल लगे यानाच्वंगु दु । वय्कलं हेटौंडाय् राजधानी तयेगु निंतिं प्रधानमन्त्री केपी ओलीया निसें नेपाल कम्युनिष्ट पार्टीया मेम्ह अध्यक्ष पुष्पकमल दाहालयात नं कन्भिन्स यानाच्वंगु दु ।

मेखे नां कने चाहे मजूम्ह प्रदेश सभाया छम्ह सांसदं राजधानी काभ्रेय् तयेगु लागिं तःधंक हे लबिङ जुयाच्वंगु खँ कनादीगु दु । वय्कःया कथं ८६ म्ह सांसदपिं काभ्रेय् राजधानी तयेमाः धइगु पक्षय् दु । प्रदेशया राजधानीयात कयाः कन्हय् नेकपा संसदीय दलया बैठक च्वनेत्यंगु खँ नं वय्कलं ‘नेपालभाषा टाइम्स’ यात कनादिल ।

वय्कःया कथं प्रदेश ३ या केन्द्रविन्दु येँ खःसां येँ केन्द्र सरकारया राजधानी जूगुलिं काभ्रेयात राजधानी दयेकेमाः धइगु सः तसः जुयाच्वंगु दु ।
प्रदेशया राजधानी गन तःसा पाय्छि जुइ धकाः अध्ययन यायेत सांसद दिपक निरौलाया संयोजकत्वय् ‘राजधानी सम्भाव्यता अध्ययन विशेष समिति’ दयेकूगु खःसा उकिया प्रतिवेदन च्वयेगु जिम्मा सांसद विशाल खड्कायात बिउगु खः ।

सांसद खड्काया प्रतिवेदनय् नं काभ्रेयात राजधानी दयेकेमाःगु सुझाव बियातःगु दु । प्रतिवेदनय् काभ्रे लिपा ख्वप, चितवन, नुवाकोट व हेटौंडाया नां सिफारिस यानातःगु दु ।

 

सम्बन्धित बुखँ

LEAVE YOUR COMMENTS