बन्चरे डाँडाया ज्या पूमवनाः स्वनिगःया फोहर वायेत समस्या

येँ – सरकारं स्वनिगःया फोहोर वायेगु थाय् तत्काल व्यवस्थित यायेमफत धाःसा स्वनिगलय् फोहोर द्वँचिनिगु अवस्था वइगु खँ धाःगु दु ।
आः फोहोर वानाच्वंगु सिसडोलय् क्षमता स्वयां अप्वः फोहोर मुनेधुंकूगु व उकिं यानाः आः अन फोहोर वायेगु ज्याय् समस्या वयेफइगु खँ धाःगु दु ।

स्वनिगलं जक न्हिं १ हजार मेट्रिक टन फोहोर वयेगु यानाच्वंगु दुसा थुकिं येँ महानगरपाखें जक ५ सय मेट्रिक टन फोहोर संकलन यायेगु यानाच्वंगु दु । सिसडोलय् आः फोहोर वायेगु अवस्था मदुगु खँ धाःगु दु । आः हे अन फोहोर द्वँ अप्वया गुगु नं इलय् चलः वनेफइगु अवस्था जूगु खँ धाःगु दु ।

सिसडोलय् २०६२ सालय् स्वदँया निंतिं फोहोर वायेगु धकाः धाःसां नं झिंस्वदँ तक नं अन निरन्तर रुपं फोहोर वायेगु ज्या जुयाच्वंगु दु ।
मेखे फोहोर व्यवस्थापन यायेगु निंतिं बन्चरे डाँडाय् आधुनिक फोहोर डम्पिङ साइत दयेकेगु धाःसां नं अन अझ नं ज्या जुयाच्वंगु मदु ।

दीर्घकालिन रुपं फोहोर व्यवस्थापन यायेगु धकाः सरकारं अन ज्या न्ह्याकूगु खः । तर स्वदँ दयेधुंकाः नं उगु लागाय् १० प्रतिशत हे ज्या क्वचाःगु मदुनि । गुकिं यानाः आः फोहोर गय् यानाः व्यवस्थापन यायेगु धइगु खँय् तःधंगु समस्या पिदनीगु खँ येँ मनपा धाःगु दु ।

सम्बन्धित बुखँ

LEAVE YOUR COMMENTS