धर्मग्रन्थ मीत्यंपिं ज्वन

येँ (नेपालभाषा टाइम्स) – लुं च्वयातःगु पुलांगु धार्मिक ग्रन्थ मीगु कुतः यानाच्वंपिंत खुम्हेसित प्रहरीं ज्वंगु दु। प्रहरीं म्हिगः पुलांगु धार्मिक ग्रन्थ मीत्यंपिं द्वपनय् उमित ज्वंगु खः । ज्वंपिं खोटाङया गेहेन्द्रसिंह आत्रय, काभ्रेया जनक गिरी, ओखलढुंगाया सुवासकुमार बस्नेत, हरिबहादर लामिछाने, येँया राजेन्द्रबहादुर जोशी व नक्वाःया रोशन तामाङ जूगु खँ प्रहरीं धाःगु दु ।

येँया प्रहरी कथं चन्द्रागिरी नगरपालिकास्थित ढुंगेअड्डाय् बुद्ध धर्मया ग्रन्थ मीत्यंगु सुचंया आधारय् वंपिं प्रहरीं उमित ज्वंगु खः । उमिसं न्यागू करोड तकां उगु ग्रन्थ मीत्यंगु खः । प्रहरी लुँ आखलं च्वयातःगु बौद्ध धर्म ग्रन्थया झिंखुगू पाना नं बरामद याःगु दु। तर उगु ग्रन्थ गनं खुया हःगु धइगु खँ धाःसा सीमदुनि ।