ने. सं. ११४६ अनलाथ्व पुन्हि -

स्वनिगलय् चिउताः– कन्हय् छु जुइ ? माःसा सेना नं कुहां वइ

येँ (नेपालभाषा टाइम्स)- कन्हय् मंसिर ७ गते जुजुवादी मेडिकल व्यवसायी दुर्गा प्रसाईं व एमाले समर्थित युवा संघपाखें अलग अलग थासय् यायेत्यंगु प्रदर्शनया कारणं येँय् छु गज्याःगु भिडन्त ब्वलनीगु खः धकाः प्यखेरं चिउताः ब्वलंगु दु । वंगु छुं न्हि न्ह्यवंनिसें कन्हय् मंसिर ७ गते छु जुइ थें धकाः उखेंथुखें न्यनेकने यायेगु ज्या जुयाच्वंगु दु ।

प्रसाईं व युवा संघपाखें कन्हय् येँया फिब्व ख्यलय् ज्याझ्वः यायेगु धकाः तोके यानातःगु खःसा येँया सिडिओं थनिंनिसें हे फिब्व ख्यलय् लछि तक छुं हे ज्याझ्वः याये दइ मखु धकाः प्रतिबन्ध तया बिउगु दु । अन प्रतिबन्ध तयेवं आः दुर्गा प्रसाईं व युवा संघ निगुलिं पक्षं अलग अलग थासय् ज्याझ्वः याः वनीगु जूगु दु ।

मेडिकल व्यवसायी दुर्गा प्रसाईं कन्हय्या ज्याझ्वःया लागिं निगू लाख मनू क्वकायेगु धकाः पिने न्ववायेगु यानाच्वंगु दु । उमित येँय् नयेगु त्वनेगु व्यवस्था तकं थम्हं यायेगु धकाः नं वं धायेगु यानाच्वंगु दु । प्रसाईंया कार्यकर्तातय्सं थ्वहे आन्दोलनपाखें पुलांम्ह जुजु ज्ञानेन्द्र शाहयात तप्यंक नारायणहिति दरवारया राजगद्दिइ यंकाः फ्यतुकेगु धकाः नं हल्ला यानाच्वंगु दु ।

मेखे युवा संघया महेश बस्नेत समर्थित कार्यकर्तातय्सं यदि प्रसाईंया कार्यकर्तातय्सं अराजक ज्या यात धाःसा उपिंलिसे भिडन्त यायेगु जुइ धकाः ख्याच्वः बियाच्वंगु दु ।

निगुलिं पक्ष अतिकं उत्तेजित अवस्थाय् दुगु जुयाः कन्हय् सुरक्षा व्यवस्था समेत थाकुगु अवस्थाय् लायेफु धकाः नं चिउताः जुयाच्वंगु दु । कन्हय्या सुरक्षा व्यवस्थायात ध्यानय् तयाः म्हिगः नेपाली सेनाया ज्याकुथिइ प्यंगुलिं सुरक्षा निकायया प्रमुखतय्गु नं बैठक च्वंगु दु । कन्हय्या अवस्था स्वयाः जनपद प्रहरी व सशस्त्र प्रहरी प्रशस्त मात्राय् परिचालन यायेगु निर्णय बैठकं याःगु दु । छुं जुयाः अवस्था स्यना वन धाःसा सेना हे क्वकाये माःसां तयार जुइगु खँ नं बैठकय् जूगु दु । कन्हय्या ज्याझ्वःयात ध्यानय् तयाः गुप्तचर विभाग नं सक्रिय जुइधुंकूगु खँ धाःगु दु ।

कन्हय्या ज्याझ्वलय् भिडन्त यायेत एमाले कुहां वयेधुंकूगु दुसा राप्रपां दुर्गा प्रसाईंया ज्याझ्वलय् खने मदयेक ब्वति कायेगु रणनीति ज्वंगु दु । सत्तारुढ दलत धाःसा छगू हे थुकी सहभागी जुइ मखु । सत्तारुढ दलं थुकियात विपक्षी पार्टी एमाले व जुजुवादीत जानाः देशय् अस्थिरता ब्वलंकेत स्वयाच्वंगु खनेदु धकाः विश्लेषण यानाच्वंगु दु ।