ज्यापु संस्कृति विकास कोषया भवन शिलान्यास

येँ (नेपालभाषा टाइम्स)- ज्यापु संस्कृति विकास कोषया भवन दयेकेगु निंतिं शुक्रवाः जग स्वनेज्या जुल । छगू ज्याझ्वःया दथुइ येँया यटखा, हाँय्पुननिइ दयेकेत्यंगु भवनया जग स्वनेगु ज्या पुलांम्ह उपप्रधानमन्त्री व संघीय सांसद प्रकाशमान श्रेष्ठं यानादीगु खः । बागमति प्रदेशया संस्कृति तथा पर्यटन मन्त्रालयया ग्वाहालिं भवन दयेकेत्यंगु खः ।

झ्वलय् न्ववानादिसें सांसद श्रेष्ठं राजनीति बांमलायेकं देय् समाजया विकास जुइफइमखु धयादिसें राणाशासनया इलं निसें देय् व समाजया निंतिं संघर्ष यानावःपिंत ल्वःमंकाः बांलाःगु नारा बिल धायेवं थज्याःगु नारा बिउपिनि लिउलिउ जुइगु ल्वःगु खँ जुइमखु धयादिल ।

थः बूगु त्वालय् हे ज्यापु संस्कृति विकासया निंतिं ज्या याना वयाच्वंगु संस्थाया भवनया शिलान्यास यायेखंगुलिं लसता प्वंकादिसें वय्कलं धयादिल, ‘जि थ्व हे यट्खा त्वालय् बूम्ह खः, जिमि बाः नं थनं हे राणाविरुद्ध संघर्ष शुरु याःगु खः । थ्व थासय् झीगु संस्कृति ल्यंगु निंतिं ज्या यायेखंगु जिगु निंतिं तसकं लसताया खँ खः ।’

विकास कोषया थ्व भवन दयेकेगु निंतिं सांसद श्रेष्ठया हे पहलय् प्रदेश सरकारं बजेट विनियोजन याःगु खः । ज्याझ्वलय् न्ववानादिसें बागमति प्रदेशया पुलांम्ह संस्कृति मन्त्री दीपेन्द्र श्रेष्ठं सांसद सिंहया इनाप कथं हे थःम्हं यक्व संघर्ष यानाः भवन दयेकेगु निंतिं बजेट विनियोजन यानागु खँ कनादिल । बागमति प्रदेश सरकारं थ्व भवन दयेकेगु निंतिं छगू करोडया बजेट बिउगु खः ।

कोषया अध्यक्ष मंगलकृष्ण सिंया सभापतित्वय् जूगु ज्याझ्वलय् सुभाय् देछासें कोषया उपाध्यक्ष सन्त महर्जनं नेवाःत धमाधम थःगु परम्परागत त्वाः त्वःताः वनाच्वंगु इलय् कोषया भवन येँया परम्परागत त्वालय् हे दयेकेमाः धयागु ल्याखं दथु त्वालय् लाःगु हायपुननिं जग्गा न्यानाः भवन दयेकेगु ज्या न्ह्याकागु खँ कनादिल ।