द्वःछि मेगावाट विजुली प्रभावित

येँ – जल विद्युत ख्यलय् जुयाच्वंगु लगानी घटे यायेत राष्ट्र बैंकं जारी याःगु न्हूगु नियमं यानाः आकिवं तकया दुने उत्पादन जुइगु धकाः आशा याना तःगु करिब १००० मेगावाट विद्युत उत्पादन प्रभावित जुइगु खँ लगानीकर्तातय्सं धाःगु दु । बजारय् ध्यबाया अभाव जुयाच्वन धइगु त्वहः चिनाः राष्ट्र बैंकं आवंलि वाणिज्य बैंकतय्सं जलविद्युतय् ५ प्रतिशत व कृषि ख्यलय् १० प्रतिशत तक जक लगानी याये दइ धइगु न्हूगु नियम पिकाःगु खः । थ्व स्वयां न्ह्यः थ्व निगुलिं क्षेत्रय् वाणिज्य बैंकतय्सं १२ प्रतिशत तक लगानी याये दइगु व्यवस्था दुगु खः ।

आपालं बैंकतय्सं जलविद्युतय् यानातःगु लगानी ५ प्रतिशत थ्यनेधुंकूगुलिं उमिसं थप ध्यबा बी मफइगु खँ धयाच्वंगु दु । राष्ट्र बैंंकं पिकाःगु थ्व न्हूगु नियमं यानाः वंगु निला न्ह्यवंनिसें बैंकतय्सं जलविद्युतय् यानाच्वंगु लगानी कम याना हःगु दुसा ज्या शुरु जुइधुंकूगु परियोजनातय्त तकं ध्यबा बीत आनाकानी याना हःगु दु । बैंकं ध्यबा मबियाः ज्या शुरु जुइधुंकूगु परियोजनात लिबाः वनीगु खतरा पिहां वःगु दु ।लगानीकर्तातय्सं धाः कथं थथे निला जक ज्या बन्द याये माल धाःसां नं परियोजना दछि लिबाः वनीगु सम्भावना दु ।

दछि लिबात धाःसा उकिया लागत अप्वयाः अन्ततः विद्युतया भाः थकाये मालीगु अवस्था पिहां वया बी । राष्ट्र बैंकया थ्व नियमं यानाः देय्न्यंकं निर्माणाधीन तःधंगु व चीधंगु यानाः ६० गू जलविद्युत परियोजना प्रभावित जुयाच्वंगु दु । थ्व फुक्क परियोजनाया उत्पादन छथासं तयेबलय् करिब १ हजार मेगावाट विद्युत जू वइ ।जलविद्युतय् लगानी याइपिंसं ३० प्रतिशत थःगु ध्यबा व ७० प्रतिशत बैंकं त्यासा कयाः ज्या याये फइगु प्रावधान दु । बैंकया त्यासाय् कडाई जुइवं लगा–नीइ समस्या वःगु खः ।