ओलम्पिक कमिटीया अध्यक्षय् जीवनराम श्रेष्ठ

येँ – नेपाल ओलम्पिक कमिटीया अध्यक्ष पदय् जीवनराम श्रेष्ठ त्याःगु दु । अध्यक्ष पदया प्रत्याशी उमेशलाल श्रेष्ठयात बुकाः श्रेष्ठ निगूगु कार्यकालया निंतिं निर्वाचित जुयादीगु खः । म्हिगः जूगु चुनावय् जीवनरामं १७ मत हःगु खःसा उमेशलालं १० मत हःगु खः । महासचिवय् निलेन्द्रराज श्रेष्ठ निर्वाचित जुयादीगु दुसा वय्कलं पुरेन्द्र विक्रम लाखेयात बुकूगु खः ।

श्रेष्ठं १५ मत हःगु खःसा लाखें १२ मत हःगु खः । सचिवय् दीपकहर्ष वज्राचार्य, रामजीबहादुर श्रेष्ठ व तुलसी थापा त्याःगु खः । उपाध्यक्षय् ज्योति राणा, चतुरानन्द बैद्य, तेज गुरुङ, अशोक वज्राचार्य व सुनिल श्रेष्ठ त्याःगु दुसा दुजलय् दीर्घबहादुर केसी, प्रकाश शमशेर राणा, टासी घले, रमेश शिवाकोटी, गोपालसुन्दरलाल कक्षपति, होमबहादुर दोङ व राम अवाले त्याःगु दु ।

म्हिगःया चुनावय् पिताम्बर तिम्सिना व रतन टण्डन निम्ह निर्विरोध निर्वाचित जूगु खः । तिम्सिना उपमहासचिव व टण्डन कोषाध्यक्षय् निर्विरोध निर्वाचित जूगु खः । कोषाध्यक्ष व उपमहासचिवय् छम्ह छम्हेसिया जक उम्मेदावारी लाःगु खः ।