संकटग्रस्त सहकारीतय्त ध्यबा लित बीत पौ !
येँ (नेपालभाषा टाइम्स)÷ सञ्चालनय् मवयाच्वंगु सहकारीयात छवाःया दुने बचतकर्ताया ध्यबा लित बीत व लछिया दुने साधारणसभा यायेत पौ वयाच्वंगु खँ धाःगु दु । सहकारीत संकटय् लानाः बचतकर्ताया ध्यबा फसे जुयाच्वंगु सन्दर्भय् अज्याःगु पौ वःगु धाःगु दु । तर येँ मनपा सहकारी विभागया प्रमुख बलराम त्रिपाठीं धाःसा तत्काल सहकारीतय्त अज्याःगु पौ च्वयेगु ज्या मजूगु खँ कनादीगु दु ।
‘नेपालभाषा टाइम्स’ लिसे खँ ल्हासें वय्कलं छुं सञ्चालकत खराब जूगु कारणं बचतकर्तात सहकारीं ध्यबा लिकायेत हथाय् चाःगुलिं हे सहकारीइ समस्या वयाच्वंगु जुयाः उकिया नितिं सहकारीयात छुं ई बीमाःगु खँ कनादिल ।
येँ मनपां तत्काल कारबाही याइगु छुं सम्भावना दु ला ? धकाः न्यनागु न्ह्यसःया लिसः बिसें वय्कलं तत्काल कारबाही थ्यंक मखुसां सहकारीयात साधारणसभा यानाः बचतकर्ताया विश्वास त्याकेगु कथं ज्या खँ यायेत सुझाव बियाच्वनागु खँ धयादीगु दु ।
बचतकर्ताया ध्यबा सहकारीतय्सं थीथी थासय् लगानी याना वयाच्वंगुलिं छक्वलं सहकारीयात कारबाही यायेबलय् झन समस्या जुइफइगु जूगुलिं टाइम टेबुल दयेकाः बचतकर्ताया ध्यबा लित बीकेगु कथं येँ मनपां गृहकार्य यानाच्वनागु खँ नं वय्कलं कनादिल ।
वय्कलं धयादिल, ‘सरकारं गठन याःगु सहकारी समस्या समाधान आयोगं चीधंगु बचतकर्ताया ध्यबा लित बीत २०८० चैत तकाया ई क्वःछिउगु दु । थ्व कथं तत्काल बचतकर्ताया ध्यबा लित बिउ धायेफइगु अवस्था मदु । अझ तःधंगु बचतकर्ताया ध्यबा लित बीत अझं ई काइ ।’
थ्वहे झ्वलय् म्हिगः सहकारी पीडिततय्सं येँया फिब्व ख्यलंनिसें न्हू बानेश्वर तक प्रदर्शन याःगु दु । सहकारी पीडित बचतकर्ता महासंघ संघर्ष समितिं बचतकर्ताया ध्यबा लित बी मफुगु सहकारी, बिसिउँ वनाच्वंगु सहकारीयात कारवाही यायेमाःगु, बचतकर्ताया समस्या फयांफछि याकनं ज्यंकेमाःगु, सहकारी सञ्चालकतय्त राजनीतिक संरक्षण बन्द यायेमाःगु माग याःगु खः ।
सहकारी पीडिततय् प्रदर्शनया झ्वलय् आन्दोलनकारी व प्रहरीया दथुइ छझाः झडप नं जूगु खः । म्हिगः सुथय् ¥याली पिकायेगु झ्वलय् सतकय् पंगः जुल धासें प्रहरीं हस्तक्षेप याःगु खः । आपालं सहकारीत संकटय् लाःसां स्वनिगःया स्थानीय मनूत हे जानाः चले यानाच्वंगु लिसें सहकारीया सिद्धान्त कथं सामुहिक ज्या यानाच्वंगु सहकारीत धाःसा समस्या मजुसे याउँक सञ्चालन जुयाच्वंगु खँ धाःगु दु ।
LEAVE YOUR COMMENTS