शेयरबजाः मंगलवाः निगू अंकं थहांवन

येँ – ताःई न्ह्यवनिसें कुहां वयाच्वंगु शेयर बजाः मंगलवाः आकाझाकां निगू अंकं थहां वंगु दु । शेयर बजाः थहां वनाः समग्र शेयरया मापन याइगु नेप्से परिसूचक २२.४४ अंकं थहां वंगु दु । अथेहे क वर्गया कम्पनीतय् मापन याइगु सेन्सेटिभ परिसूचक नं ४.५५ अंकं थहां वंगु दु ।
स्टकया कथं मंगलवाः मुक्कं १६७ गू कम्पनीया २१ करोड ४५ लाख ८८ हजार ६१९ ता बराबरया न्हय्गू लाख १४ हजार ८७६ कित्ता शेयर न्यायेमी जूगु खः ।

थ्व कारोवारया झ्वलय् फुक्क उपसमूहया कारोवार थहां वनेवं नेप्से परिसूचक नं सकारात्मक खनेदुगु खः । म्हिगः दकलय् अप्वः जीवन बीमाः व निर्जिवन बीमा समूहया कारोवार थहां वन । जीवन बीमा २५१.७३ अंकं व निर्जीवन बिमा १५३.९३ अंक थहां वंगु खः । थुकिया लिसें वाणिज्य बैंक समूह १४.६९ अंकं, होटल २३.०५ अंकं, विकास बैंक २१.१६ अंकं, जलविद्युत समूह २७.०५ अंकं थहां वंगु खःसा फाइनान्स समूह धाःसा थहांकुहां मजुल ।

अथेहे उत्पादन ६.१३ अंकं, अन्य १५.५४ अंकं, लघुवित्त ४१.२८ अंकं थहां वंगु खः । अथेहे दकलय् अप्वः चौतारी लघुवित्त वित्तीय संस्था व कालिका लघुवित्त वित्तीय संस्थाया शेयर धनीतय्सं कमे यायेखन । थुपिं निगुलिं कम्पनीया भाः ९ प्रतिशतं थहां वंगु खः । थुकिया लिसें नयाँ नेपाल लघुवित्त वित्तीय संस्था, सूर्य लाइफ इन्स्यारेन्स, गुराँस लाइफ इन्स्योरेन्स कम्पनी व डिप्रोक्स लघुवित्त वित्तीय संस्थाया शेयरधनीतय्सं ७–७ प्रतिशत कमे याःगु खः ।

मेखे वल्र्ड मर्चेन्ट बैंकिङ्ग एण्ड फाइनान्सया शेयरधनीतय्सं धाःसा दकलय् अप्वः १० प्रतिशत द्यापं फयेमाल । वल्र्ड मर्चेन्ट धुंकाः दकलय् अप्वः द्यापं फयेमाःपिं खानीखोला हाइड्रोपावर ३.७५ अंकं व आँखु खोला जलविद्युत कम्पनीया शेयरधनीतय्सं २.४६ प्रतिशतं द्यापं फयेमाःगु खः । कारोवारया आधारय् माथिल्लो तामाकोशी जलविद्युत कम्पनीं दकलय् अप्वः १ करोड २७ लाख ९३ हजार, नागरिक लगानी कोषं ९७ लाख १९ हजार ६९० तका, नेपाल बैंक लिमिटेडया ८९ लाख ९२ हजार ४९५ तकाया कारोवार जूगु खः ।