फास्ट ट्राय्क बुंगय् यंकेगु कथं नक्साया डिजायन

येँ – फास्ट ट्रयाकया जिरो प्वाइन्ट बुंगया फर्सिडोलय् तयेगु कथं सहमति जुइवं स्थानीय जनतां नं तिबः बीगु जूगु दु । जिरो प्वाइन्ट बुंगय् लाइगु जूगुलिं स्थानीय थाय्या विकास लिसें स्थानीययात रोजगारी अवसर चूलाइगु खँ फास्ट ट्रयाक सरोकार समितिं दुजः इन्द्रमान तुलाधरं ‘नेपालभाषा टाइम्स’ यात कनादीगु दु ।

न्हापा फास्ट ट्रयाक खोनाय् तयेगु कथं सरकारं योजना दयेकूगु खःसा खोनाया स्थानीय वासिन्दा विरोध याःगुलिं आः बुंगय् तयेयंकेगु कथं नक्साय् नं मेगु हे कथं डिजाइन यानाच्वंगु खँ धाःगु दु । खोनाय् फास्ट ट्रयाक तयेबलय् खोनाया ११ रोपनी जग्गा लाइगु खःसा बुंगया ७११ रोपनी लाइगु जुयाच्वंगु खः । आः बुंगया फर्सिडोलय् जिरो प्वाइन्ट तयेवं मुक्कं ३०० रोपनी जग्गा जक अधिग्रहण याःसा गाःगु खँ नं तुलाधरं कनादीगु दु ।

बुंगं फर्सिडोल वनेगु लँपु नितान्त छम्ह व्यक्तिया जक जग्गा लानाच्वंगु व उगु जग्गाय् छेँ नं दुगु खँ कनादिसें तुलाधरं उकिया उचित क्षतिपूर्ति बीगु खँय् नं सेना सहमत जुइधुंकूगु जानकारी नं वय्कलं बियादीगु दु । वय्कलं धयादी, ‘आः सेनां थौंकन्हय् प्रचलित भावं जग्गाया मुआब्जा बीत सहमत जूगु दु, लिसें उगु जग्गाय् लानाच्वंगु छेँया नं उचित क्षतिपूर्ति बीत तयार जुयाच्वंगु दु ।

बुंग लागा तेत्तिस कोटी देवीदेवताया वासस्थान जूगु थाय् धासें वय्कलं धयादी, ‘झीसं जात्रा, पर्व, संस्कृति धकाः जक च्वनेगु उचित मखु, ई कथं थःगु थाय्या विकासया लिसें परम्परायात नं म्वाकेगु ज्या यायेमाः ।’

वय्कःया कथं फास्ट ट्रयाक दयेकेधुंकाः बुंगयात माइक्रो म्यानेजमेन्ट जक यायेफत धाःसां नं तःधंगु व्यापारया सम्भावना दुगु खँ कनादिसें धयादी, ‘थन पानीपुरी मीगु निसें फाइभ स्टार होटल तकं विकास याये फइगु सम्भावना दु ।’

विकासयात बांमलाःगु दृष्टिकोणं जक स्वयेमजिउगु खँ कनादिसें वय्कलं उकी दुगु बांलाःगु पक्षयात आत्मसाथ यानाः न्ह्याःवनेमाःगु खँ नं कनादीगु दु । वय्कःया कथं खोनाया स्थानीय वासिन्दां नं थुकियात कयाः बिचाः यायेमाःगु खनेदु । वय्कलं धयादी, ‘विकासयात गुकथं झीगु पक्षय् हयेगु मू खँ खः ।’ बुंग लागा सांस्कृतिक व पर्यटकीय थाय् जूगु खँ कनादिसें वय्कलं फास्ट ट्रयाक लिपा अनया विकास जुइगु खँ नं धयादीगु दु ।