ने. सं. ११४६ अनलाथ्व पुन्हि -

थौं होलि पुन्हि, थौं हे गुरुमापायात जा नकीगु

येँ (नेपालभाषा टाइम्स)- थौं होलि पुन्हि । स्वनिगः नापं देय्या पहाडी लागाय् थौं रंग व लखं छ्वाकाः होलि म्हितेगु ज्या जुयाच्वंगु दु । थौंया होलि शिष्ट कथं व प्लास्टिकया फोहोर पिहां मवइकथं म्हितेत सरकारं इनाप याःगु दु । थौं बहनी बसन्तपुली धंकातःगु चीर क्वःथलेवं होलि क्वचाइ ।

पञ्चाङ्ग निर्णायक समितिं थौंया हे ल्याः तयाः कन्हय् सुथय् सवा पाँच बजे जक चीर क्वःथलेगु साइत बियातःगु दु । लिसें थौं हे बहनी किलागः त्वालं छमुरी जाकिया जा व छम्ह म्येय्या घासा दयेकाः तिंख्यलय् गुरुमापायात नके यंकेगु ज्या नं जुइ ।