पल्सर डेयर भेन्चरया दर्ता सुरु

येँ – पल्सर मोटरसाइकलं याना वयाच्वंगु पल्सर डेयर भेन्चरया प्यंगूगु सिजनया निंतिं नां दर्ता सुरु जूगु दु । नेपाःया हे लोकंह्वाःगु साहसिक व न्हापांगु बाइक रियालिटी शो डेयर भेन्चरया प्यंगूगु सिजनया झ्वलय् थुगुसी भारतया लदाख तक यंकेत्यंगु दु ।पल्सर बाइक उत्पादन याइगु बजार मोटरसाइकलया अधिकृत विक्रेता हंसराज हुलासचन्द एण्ड कम्पनीं थ्व शो याना वयाच्वंगु खः ।

कम्पनीं थुगुसी न्हापांखुसी बाइक राइडरतय्त विदेशी भूमिइ यंकेत्यंगु खः । साहसिक लँया उचाइ मापन यासें अद्भूत अनुभवया निंतिं बाइकरतय् दथुइ तसकं लोकंह्वाःगु गन्तव्य लदाख यंकेगु खँ कम्पनीं धाःगु दु ।

थुकिया निंतिं कम्पनीं नां दर्ता सुरु याःगु दु । श्रावण ४ गते तक नां दर्ता याइसा थुकी बजाजया बाइक चालक मखुपिंसं नं नां दर्ता यायेफइगु खँ धाःगु दु ।थुगुसी विदेशी भूभाग वनेगुया रोमाञ्चक बाहेक विजेतां झिगू लाख पुरस्कारया लिसें पल्सर एनएस २०० मोटरसाइकल नं त्याके फइ ।