हुलाप्याखं व एरोबिक्सया समिश्रण धिम्बा डान्स

थौंकन्हय् मनूतय्के थःगु स्वास्थ्यप्रति गाक्कं हे चेतना ब्वलनाच्वंगु दु । थःगु स्वास्थ्ययात गुकथं स्वस्थ, स्पूmर्त व तन्दुरुस्त याना तयेमाः धइगु खँय् न्हापा स्वयां यक्व हे चेतना अभिवृद्धि जूगु खनेदु । उकिं थौंकन्हय् मनूतय्सं सन्तुलित नसाज्वलं नयेगु नापं नसात्वँसाय् नं उतिकं ध्यान बीगु याना वयाच्वंगु दु ।

थ्व बाहेकं नं मनूतय्सं थःगु स्वास्थ्ययात ल्वचं तापाक तयेगु निंतिं वा अप्वः मल्ह्वनेमा धइगु ल्याखं शारीरिक ब्यायाम, कसरत, जीम, स्वीमिङ, जुम्बा आदि वनेगु याना हयाच्वंगु दु । अथे खःसां धू व कुं आक्रान्त जुयाच्वंगु थ्व स्वनिगलय् झीत स्वस्थ जीवन म्वायेगु निंतिं थौंकन्हय् छगू तःधंगु हाथ्या नं जुयाच्वंगु दु ।

थ्व हे हाथ्या दथुइ नं मनूतय्सं अनेक उपाय छ्यलाः स्वस्थ जुइगु कुतः यानाच्वंगु झीसं खनाच्वना । थुकी थौकन्हय् ल्यासेल्याय्म्ह बुराबुरीतय् दथुइ न लोकंह्वनाच्वंगु धइगु सुथसिया शारीरिक ब्यायाम । उकिसनं गुलिं मर्निङ्ग वाक वनेगु, गुलिं जिम यायेगु, गुलिं जुम्बा व गुलि योगा याइपिं नं दु ।

थ्व दथुइ ‘थः, छेँजः व समाजया निंतिं धिम्बा हुलेनु, स्वस्थ जीवन म्वायेनु’ धइगु मू नारा बियाः छगू संस्था पलिस्था जुल धिम्बा डान्स एण्ड मोर, यल । दकलय् न्हापां थः स्वस्थ जुइमाः । थः धुंकाःया महत्वपूर्ण धइगु छेँजः खः, अले समाज । थः अले छेँजःमध्ये सुं छम्ह म्हं मफुत धाःसा वा उसाँय् पाय्छि मजुल धाःसा छुं नं ज्या कथंहंक याये फइमखु, तिप्यंक याये फइमखु ।

जब थः अले छेँजः सकसिगुं पाय्छिगु अवस्था जुइ अले समाजया चिउताः कायेगु पाय्छि जुइ । थुकथं व्यक्तिगत, पारिवारिक व सामाजिकनापं थःत स्वस्थ याना तयेगु ताः तयाः पलिस्था जूगु धिम्बा डान्स एण्ड मोरं थःगु न्हापांगु पलाःकथं सुथय् घौछित्या Aerobics या माध्यमं हुलाप्याखं हुलेगु ज्याझ्वः न्ह्याकूगु खः ।

Aerobics या नापनापं नेवाः मौलिक हुलाप्याखं, आधुनिक व चचा प्याखँ तक न स्यनेगु ज्या थ्व संस्थां याना वयाच्वंगु दु । अथे खःसां थ्व संस्थाया विशेषता धइगु हे धिमय् बाजंया मू तालय् Aerobics याकेगु खः । शारीरिक सन्तुलनया निंतिं थौंकन्हय्या पुस्ता जुम्बापाखे आकर्षित जुयाच्वंगु दु । जुम्बा पिनें वःगु संस्कृति खःसा धिम्बा नेपाःया थःगु हे मौलिक शैलीया आविष्कार खः धाःसां छुं पाइमखु ।

‘धिम्बा गुगुं हुलाप्याखंया नां मखु । थ्व शारीरिक अभ्यास वा व्यायाम यायेत पाश्चात्य संगीतया लिधंसाय् मखसे मौलिक नेवाः बाजं धिमय्या तालय् नं Aerobics यायेजिउ धइगु छगू न्हूगु छ्यला खः’ संस्थाया व्यवस्थापक सुरज व्यञ्जनकारं धयादी । ‘थुकियात हे आधार कयाः धिम्बा डान्स एण्ड मोरया नामं संस्था चायेकाः थनिं दत्या न्ह्यःनिसें थुकथंया प्रशिक्षण न्ह्याका वयाच्वनागु खः ।

उकिं थ्व ‘धिम्बा’ गुगुं हुलाप्याखंया नां वा विधा मखु संस्थाया नां जक खः । छगू ब्राण्डया नां खः ।’, वय्कलं धयादिल । संस्थां विशेष यानाः थौंकन्हय् छेँज्याय् तक्यना च्वंपिं गृहिणतय्त लक्षित यानाः इमिगु शारीरिक व मानसिक स्वस्थताया निंतिं न्हियान्हिथं कक्षा न्ह्याका वयाच्वंगु दु ।

‘थः अले छेँजः स्वस्थ जूसा समाजया निंतिं नं छुंकथं योगदान बी फइ धइगु परम्परागत मान्यता ज्वनाः थुगु संस्थां सदियौं न्ह्यवंनिसें न्ह्याना वयाच्वंगु सांस्कृतिक परम्पराय् नं पूmचाःगु योगदान बिया वयाच्वनागु दु’ संस्थाया मुख्य प्रशिक्षक सुरोज महर्जनं धयादिल । थ्व हे धारणा तयाः संस्थापाखें थीथी सांस्कृतिक जात्रापर्वय् नं सक्रिय रुपं ब्वति कयावयाच्वंगु दु ।

मुख्य प्रशिक्षक महर्जनं धयादिल ‘थौंकन्हय् थुगु संस्थाय् मिजंतय्गु स्वयां नं मिसापिनिगु अप्वः दु । थ्व ल्याखं सांस्कृतिक परम्पराय् मिसापिनिगु सहभागिता अप्वयेकेगु ज्या संस्थां याना वयाच्वंगु दु ।’

सांस्कृतिक, धार्मिक ल्याखं महत्वं जाःगु व देय्या हे दकलय् ताःहाकःगु जात्राकथं कयातःगु बुंगद्यःया जात्राया झ्वलय् विशेष यानाः याकःमिसाया भुज्याःया इलय् धिम्बा डान्स एण्ड मोरया दुजःपिं व प्रशिक्षार्थीपिंत धिमे व धिमेप्याखं स्यना जात्राय् सक्रिय रुपं ब्वतिकायेका च्वंगु दु । बुंगद्यःया जात्राया लिपांगु दिं जाह्वला जात्राय् नं धिमे बाजंसहित ‘मिसा धिमेप्याखं न्ह्यब्वया वयाच्वंगु दु ।

‘सांस्कृतिक आदानप्रदान यायेकथं यलया मिसातय्सं धिमे बाजंसहित सखे न्हापांखुसि हाकुपतासिं सिनाः ख्वपय् सापारुया झ्वलय् घिन्ताङ्गघिसि हुइत ताःलागु दु ।’ मुख्य प्रशिक्षक महर्जनं गर्व यानाः धयादिल, ‘थुकथं ऐतिहासिक रुपं यलया मिसातय्सं धिमे बाजनय् हाकुपतासि सिनाः धिमेप्याखं हुलाः ब्वति काःगु इलय् ख्वपया स्थानीय संस्कृतिप्रेमीत नं अतिकं उत्साहित जूगु जक मखु साँस्कृतिक आदानप्रदानया ज्वःमदुगु दसूकथं नं टिप्पणी याःगु खः ।’

धिम्बा डान्स एण्ड मोर संस्था मेमेगु हुलाप्याखं स्यनीगु संस्था स्वयां गाक्कं पाः । संस्थां व्यावसायिक रुपं लबः कायेगु स्वयां नं मनूतय्त गुकथं स्वस्थ याना तयेगु व साँस्कृतिक उत्थानया ज्याय् फक्व अप्वः तिबः बी फइ धइगु खँयात हे ध्यानय् तयाः न्ह्याः वनाच्वंगु खनेदु ।

आतक यलय् हे जक सीमित जुयाच्वंगु धिम्बा डान्सयात संस्थां लिपांगु इलय् वयाः थाय्थासय् थ्व अभियान न्ह्याका यंकेगु उद्देश्यं प्रशिक्षक उत्पादन यायेगु ल्याखं नं कक्षा संचालन याना वयाच्वंगु दु । संस्थां थःगु बिस्कंया म्हसीकाया निंतिं वँचुगु टिसर्ट व हाकुगु ट्राउजरयात थःगु ड्रेस कोडया रुपय् छ्यलाच्वंगु दु ।
न्ह्यब्वःम्ह ः उदेन न्हूसाय्मि