नेपाल लाइफया सदाबहार जीवन बीमा

येँ – नेपाल लाइफ इन्स्यारेन्सं कम्पनीं ‘नेपाल लाइफ सदावहार जीवन बीमा योजना’ नामं न्हूगु बीमा योजना हःगु दु । कम्पनीं आइतवाः निसें हे थ्व योजना लागू याःगु खः । थ्व योजनाया मू विशेषता आजीवन जोखिम बहन याइगुव बीमा अवधिलिपा समर्पण मूल्य कायेदइगु खँ धाःगु दु ।

अथेहे थ्व योजनाय् बीमा याःपिंसं दँय्दसं बीमांकया ५ प्रतिशत दरं जुइगु ध्यबा बीमालेखया वार्षिकोत्सवय् भुक्तानी कायेखनी । थ्व योजनाया निंतिं बीमांक रकम म्होतिं नं निगू लाख क्वःछिनातःगु दुसा बीमा याइपिनि आयस्रोत स्वयाः थः यक्व बिमांक तयाः बीमाः यायेफइगु खँ कम्पनीं धाःगु दु ।

थ्व योजनाय् म्होतिं नं झिंछदँ दुपिं निसें अप्वलय् ६५ दँ दुपिं तक सहभागी जुइफइ । अथेहे दुर्घटना मृत्यु लाभ, बीमा शुल्क छुट सुविधा व असक्त सुविधा कायेगु निंतिं झिंखुदँ व घातक रोग सुविधा कायेगु निंतिं १८ दँ तोके यानातःगु दु । थ्व योजना न्यादँ निसें नीदँ तकया निंतिं कायेफइसा बीमा शुल्क भुक्तानी क्वचाइगु उमेर अप्वलय् ७० दँ तोके यानातगु दु ।

बीमा रकम वार्षिक, अर्धवार्षिक, त्रैमासिक वा मासिक रुपं पुलेफइ । बीमालेख चालु जुयाच्वंगु अवस्था बीमाशुल्क भुक्तानी अवधि दुने बीमित सित धाःसा बीमालेख अन्तर्गत पूवंक बीमांक रकम व नियमानुसार बोनस एकमुष्ट कायेखनी । थुकी बीमितयात दँय्दसं ५ प्रतिशतया ल्याखं बियाच्वंगु आंशिक भुक्तानी ध्यबा नं कटे मयाइगु खँ धाःगु दु ।