होङ्सी व घोराही सिमेन्ट गुणस्तरहीन

येँ – गुणस्तरहीन सिमेन्ट उत्पादन याःगुलिं नेपाल गुणस्तर तथा नापतौल विभागं थौंकन्हय् तसकं बय्बय् जुयाच्वंगु होङ्सी सिमेन्ट व घोराही सिमेन्टयात कारवाही याःगु दु । विभागं घोराही व होङसीया लिसें ६७ गू उद्योगयात गुणस्तरहीन सामान उत्पादन याःगु धासें कारवाही याःगु खः । कारवाहीलय् लाःगु ६७ गू उद्योग मध्ये गुंगू सिमेन्ट उद्योग लाःगु दु ।

विभागया कथं चालु आर्थिक दँया जेठ तक गुणस्तर विपरीत सामान उत्पादन याःपिंत थ्व कारवाही जूगु खः । विभागं घोराही सिमेन्ट प्रालि दाङ, नारायणी माइक्रो पाइप उद्योग बारा, नव नेपाल प्लाष्टिक, नारायणी सिमेन्ट उद्योग बारा, होङ्सी शिवम् सिमेन्ट प्रालि, प्रिमियर वायर प्रालि विराटनगर, विश्वकर्मा सिमेन्ट प्रालि पर्सा, एशियन थाई फुड प्रालि, मेगा सिमेन्ट झापा, लक्ष्मी स्टिल प्रालि नवलपरासी, काठमाडौँ स्टिल प्रालि नवलपरासी, सुगा म्यानुफ्याक्चर, गोल्डेन ब्याट्री, गोरखकाली सिमेन्ट झापा, अन्नपूर्ण सिमेन्ट मोरङ, मारुती सिमेन्ट, ओम सिमेन्ट, जस्मिन पेन्टस् चितवन, नेपाल शालिमार सिमेन्ट, पशुपति पेन्ट्स, अम्बे सिमेन्ट, शिखर केवल, प्रिमियर केवल, एभरेष्ट रोलिङ मिल्स, शिवशक्ति घ्यू उद्योग, जगदम्बा स्टिल, कमला रोलिङ मिल्स, लक्ष्मी स्टिल, नेपाल अम्बुजा सिमेन्ट, एशियन थाइफुड, युनिट वायर एण्ड केवल, मित्तल सिमेन्टया कारवाही याःगु खः ।

विभागया महानिर्देशक विश्वबाबु पुडासैनीं मापदण्ड पूमवंक सामान उत्पादन मयाःगु व गुणस्तर कथं सामान उत्पादन मयाःगु उद्योगतय्त कारवाही यानागु खँ राससयात धयादीगु दु । वय्कलं कारवाहीलय् लाःगु फुक्क धयाथें उद्यागया इजाजतपत्र स्थगन यानाः उत्पादन जूगु सामान नं मीत प्रतिबन्ध तःगु खँ धयादीगु दु ।

वय्कलं कारवाहीलय् लाःपिं फुक्क उद्योगयात गुणस्तरकथं सामान उत्पादन यायेत पौ वनेधुंकूगु धयादिसें आः नं गुणस्तरहीन सामान उत्पादन यात धाःसा लाइसेन्स हे खारेज जुइगु खँ धयादीगु दु । विभागं उद्योग व बजारय् अनुगमन यानाः मापदण्ड विपरीत उत्पादन जूगु लुइकल धाःसा अज्याःगु उद्योगयात कारवाही यायेगु याना वयाच्वंगु दु ।

सम्बन्धित बुखँ

LEAVE YOUR COMMENTS