पुलांगु कर पुलेवं नेसनल हाइड्रोपावर घाटाय्

येँ – पुलांगु कर पुलेवं नेसनल हाइड्रोपावर कम्पनी घाटाय् वंगु दु । कम्पनीया अध्यक्ष कुमार पाण्डें झिदँ न्ह्यवया दायित्व कर पुलेवं कम्पनी घाटाय् वंगु खँ कनादीगु दु । वय्कलं धयादीगु दु, ‘आः कम्पनीया कर दायित्व मन्त ।’नेसनल हाइड्रों सरकारयात ४ करोड ५ लाख ८२ हजार कर पूगु खः । थ्व कर पुलेवं नेसनल चालू आर्थिक दँया खुलाया दुने ९७ लाख २१ हजार घाटा जूगु खः ।

चालु आर्थिक दँया स्वलाया न्हापांगु त्रैमासिकय् कम्पनीं ९५ लाख २९ हजार खुद नाफा आम्दानी याःगु खः । कम्पनीं चालु आर्थिक दँया खुलाया दुने मत मियाः ५ करोड ३९ लाख २१ हजार तका आम्दानी याःगु दु । कम्पनीया संचित नोक्सानी ४३ करोड तका दु । कम्पनीया प्रतिशेयर आम्दानी २.८१ तका दु ।