झाँकि ब्वज्याय् नेवाः पुचः युएइ न्हाप

येँ – नीप्यक्वःगु अन्तर्राष्ट्रिय आदिवासी दिवसया लसताय् नेफिन युएईपाखें ग्वसाः ग्वःगु झाँकि ब्वज्याय् नेवाः पुचः युएइपाखें न्ह्यब्वःगु झाँकिं न्हाप लाकेत सिरपाः त्याकेत सफल जूगु दु । नेफिन युएईनाप आवद्ध थीथी झिंछगू संघसंस्थां ब्वति काःगु झाँकि ब्वज्याय् नेवाः पुचःया सांस्कृतिक झाँकि दकलय् उत्कृष्ट जुइत ताःलाःगु खः ।

नेवाः पुचः युएइपाखें न्ह्यब्वःगु झाँकिइ मुख्य आकर्षणया रुपय् लाखे, कुमारि, पुलुकिसि, धिमय्, खिं, भुस्याः ताः, बबू लगायतया परम्परागत बाजं दुथ्याःगु खः । ब्वज्याय् ब्वति काःपिं मिसापिंसं नं परम्परागत नेवाः वसःलिसें क्वतः, सिन्हःमू, ज्वलान्हाय्कं, अन्ति, त्वाःदेवा, सुकुन्दा आदिया नं ब्वज्या याःगु खः ।

उगु ब्वज्याय् लक्ष्मण श्रेष्ठ, योहान श्रेष्ठ, शिव श्रेष्ठ, कुमार बलामि, राजेश प्रधानं परम्परागत नेवाः बाजं थानाः ब्वति कयादीगु खःसा हिरालाल श्रेष्ठं लाखे, सायना श्रेष्ठं कुमारि, सुनिलमान श्रेष्ठ व गोपाल महर्जनं पुलुकिसि प्याखं न्ह्यब्वयादीगु खः । पुलुकिसि प्याखं न्ह्यब्वयेत माःगु ग्वाहालि भुनव नकःमि, अञ्जना कर्माचार्य नकःमि, शैलेन्द्र रोष्, अर्चना सिख्राकार रोय व सुनिलमान श्रेष्ठं विशेष ग्वाहालि यानादीगु खः ।

ज्याझ्वलय् पुचःपाखें निश्मा श्रेष्ठं नेवाः प्याखं न्ह्यब्वयादीगु खः । उगु ज्याझ्वलय् पुचःया न्वकु राजेश प्रधान, नेफिन अन्तर्गतया पत्रकार संघ (फोनिज)या न्वकु पदय् व पुचःया केन्द्रीय मिसा प्रमुखय् कामना श्रेष्ठ, कलाकार संघया लिउ दांभरिं पदय् निर्वाचित जुयादीगुलिं वय्कःपिंत भिंतुना नं देछाःगु खः ।

थुकथं हे ज्याझ्वलय् नेफिन युएइं पुचःया निंतिं विशेष योगदान बिउगु धासें मनोजप्रसाद श्रेष्ठ व सुनिलमान श्रेष्ठयात कदर पत्र लःल्हासें सम्मान याःगु खः । झाँकि ब्वज्याया हे झ्वलय् नेवाः नसा ज्वलंया नं ब्वज्या जूगु खःसा उकिया व्यवस्थापन पुचःया केन्द्रीय दुजः नापं एभरेष्ट मार्शल आर्टस्या प्रमुख रवि शाही यानादीगु खः ।

नसा ज्वलं ब्वज्याया निंतिं पुचलं दयेकूगु स्टलं स्वंगूगु थाय् प्राप्त याःगु खः । ज्याझ्वलय् थीथी सांस्कृतिक ज्याझ्वः नं न्ह्यब्वःगु खःसा उकिया संयोजन पुचःया मूछ्यांजे कुमार बलामिं यानादीगु खः ।

सम्बन्धित बुखँ

LEAVE YOUR COMMENTS