ने. सं. ११४४ ञलाथ्व दशमी -

येँ व पोखराया सम्पदायात पर्यटनलिसे स्वायेमाः :मेयर शाक्य

येँ (नेपालभाषा टाइम्स) – येँ महानगरपालिकाया प्रमुख विद्यासुन्दर शाक्यं येँया मानव निर्मित सम्पदा व पोखराया प्राकृतिक सम्पदायात पर्यटनलिसे स्वायेमाःगु खँ धयादीगु दु । नेपाःया अर्थतन्त्रया दुगःक्वेंया रुपय् दयाच्वंगु पर्यटनया माध्यमं निगू सम्पदायात पर्यटनलिसे स्वानाः देय्या अर्थतन्त्रयात समृद्ध याये फइगु वय्कलं धयादीगु दु ।

येँ मनपा प्रमुख शाक्यं पोखरा महानगरपालिकाया अध्ययन व अवलोकन भ्रमण झ्वलय् उगु खँ धयादीगु खः । येँया सांस्कृतिक पर्यटन व पोखराया प्राकृतिक पर्यटनयात स्वानाः पर्यटन प्रवद्र्धनया ज्या याये फत धाःसा पर्यटन व्यवसायपाखें देय्या आर्थिक समृद्धिइ तःधंगु तिबः बी फइगु वय्कलं धयादिल ।

येँ मनपा प्रमुख शाक्यं येँ मानव श्रृजित कला, कलात्मक व धार्मिक महत्वया देगः, जात्रा, पर्वया सहर जूगु चर्चा यासें पोखरा नं उकथं हे प्राकृतिक स्रोतं सम्पन्न सहर जूगु खँ धयादिल । येँ जिल्ला भौगोलिक रुपं चिधं जूसां नं जनघनत्वया चाप अप्वःगुलिं व्यवस्थापनय् समस्या व चुनौति दुगु चर्चा यासें पोखरां येँ देशं याःगु गल्ती दोहरे मयायेत इनाप यानादिल ।

पोखरा महानगरपालिकाया प्रमुख मानबहादुर जिसीं येँ महानगरपालिका ज्येष्ठ व संघीय राजधानीया महानगरपालिका जूगुलिं दक्वं पालिकाया समस्या समाधानया नेतृत्व यायेमाः धयादिल । योजना छनोटया प्रक्रिया आः पुलांगु हे प्रणाली जूगु धासें कर्मचारी व्यवस्थापन नं जुइ मफुगुलिं समस्या जुयाच्वंगु वय्कलं धयादिल ।

उगु इलय् येँ मनपाया उपप्रमुख हरिप्रभा खड्गी श्रेष्ठं नगरपालिकातय् दथुइ थवंथवय् समस्या, समाधान, सम्भावनाया निंतिं जूगु अभ्यासया अनुभव कालबिल यायेमाः धयादिल । वय्कलं संघ व प्रदेश सरकारलिसे स्वयां आम नागरिकया समस्या स्थानीय सरकारलिसे दकलय् सतिक दयाच्वनीगुलिं स्थानीय सरकार दथुइ क्वातुगु सम्बन्ध व सहकार्यया आवश्यक दुगु नं धयादिल ।

येँ मनपाया प्रमुख प्रशासकीय अधिकृत राजेश्वर ज्ञवालीं नं नवानादीगु खःसा उगु इलय् छम्हं मेम्हेसित मतिनाया चिं नं लःल्हायेगु ज्या जूगु खः ।