प्रतिपक्षीविहीन जुइकथं प्रदेश सरकार दयेके मजिउ
येँ (नेपालभाषा टाइम्स) – नेपाली कांग्रेसया उपसभापति विश्वप्रकाश शर्मां प्रदेश सरकार नीस्वनेगु खँय् कांग्रेसया बटम लाइन प्रतिपक्षी विहीन जुइकथं प्रदेश सरकार नीस्वने मजिउ धयादीगु दु । म्हिगः पार्टी ज्याकुथी ग्वसाः ग्वःगु पत्रकार सम्मेलनय् नवासें वय्कलं उगु खँ धयादीगु खः ।
वय्कलं धयादिल, ‘प्रदेश सरकार दयेकेगु व हिलेगु ज्या जुयाच्वंगु इलय् प्रतिपक्षी विहीन परिकल्पना मयासे क्वःछीमाः उकिया निंतिं मालधाःसा कांग्रेस प्रतिपक्षय् च्वनेत नं तयार दु । तर नागरिकया मानेविज्ञान अःखः दल सरकारय् वनेगु जुइ मखु ।’
वय्कलं प्रदेश सरकारय् दलतय् दथुइ छुं समस्या खनेदुगु व उकियात कयाः सार्वजनिक रुपय् टिप्पणी यायेगु स्वयां आन्तरिक रुपय् संवाद यायेगु ज्या जुयाच्वंगु नं धयादीगु दु ।
मेखे बागमति प्रदेश सरकार नीस्वनेगु निंतिं निगू कम्युनिष्ट पार्टी दथुइ सहलह जुयाच्वंगु दु । नेकपा एमाले व नेपाली कम्युनिष्ट पार्टी दथुइ सहलह जुयाच्वंगु खँ धाःगु दु । निगू कम्युनिष्ट पार्टी दुने सहलह जुयाच्वंगु कारणं बागमति प्रदेशय् एमालेया मन्त्रीतय्सं राजीनामा मबिउसे च्वनाच्वंगु खः ।
LEAVE YOUR COMMENTS