प्रदेश ३ य् काँठ चक्रपथया तयारी
येँ – ३ नम्बर प्रदेश सरकारं स्वनिगःया स्वंगू जिल्ला व सुइगू प्रदेश निर्वाचन क्षेत्र स्वाइकथं स्वनिगःया काँठ चक्रपथ दयेकेगु ज्यायात गौरबया आयोजना कथं न्ह्याकीगु जूगु दु । उगु चक्रपथया लम्बाइ १३५ किलोमिटर जुइ । आयोजनाया विस्तृत परियोजना प्रस्ताव तयार यायेगु निंतिं सरकारं १ करोड २० लाख तका फ्याःगु दु ।
प्रदेश सरकारं स्वनिगःया काँठ क्षेत्रय् चक्रपथ दयेकेगु योजना कथं अध्ययन यायेत्यंगु खः ।१३५ किलोमिटर काँठ चक्रपथ मध्ये शंखरापुर नगरपालिकां कागेश्वरी नगरपालिका जुयाः गोकर्णेश्वर नगरपालिका तकया २५ किलोमिटर विस्तृत परियोजना प्रस्ताव (डीपीआर) तयार जुइधुंकूगु खँ प्रदेश ३ या भौतिक तथा पूर्वाधार मन्त्रालयं धाःगु दु ।
ल्यं दनिगु ११० किलोमिटरया नं सम्भाव्यता अध्ययन जुयाच्वंगु खँ मन्त्रालयं धाःगु दु । काँठ चक्रपथ दयेकेगु निंतिं सतकया केन्द्रबिन्दुपाखें निखेरं न्यागू न्यागू मिटर जग्गा कायेगु कथं मापदण्ड क्वःछिनातःगु दु । सरकारं जग्गाया मुआब्जा बी मफइगु जूगुलिं जग्गा बी चाहे मजूगु थासय् धाःसा ज्या मयायेगु खँ धाःगु दु ।
थज्याःगु अवस्थाय् सम्भव जुतले मेगु थासं सतक यंकेगु तयारी जुयाच्वंगु दु । मेखे सरकारं ७२ किलोमिटरया बाहिरी चक्रपथ दयेकेगु धकाः तयारी यानाच्वंगु दु । काँठ चक्रपथ दयेकल धाःसा स्वनिगलय् अझ अप्वः जनसंख्याया चाप अप्वयेफइगु खँ धायेगु यानाच्वंगु दु । आपालं मनूत राजधानीइ छेँय् दयेकेत लालायित जुयाच्वंगुलिं जनसंख्याया चाप अप्वइगु सम्भावना दुगु खँ विज्ञपिंसं धायेगु यानाच्वंगु दु ।
LEAVE YOUR COMMENTS