ऐतिहासिक पुखू संरक्षणया ज्या न्ह्यात

थिमि – मध्यपुर थिमि नगरपालिका वडा नं. ८ या ऐतिहासिक कमलपुखू संरक्षण यायेगु ज्या न्ह्याःगु दु । मध्यपुर थिमि नगरपालिकां बोडेया उगु ऐतिहासिक पुखूया संरक्षणया निंतिं गुरुयोजना निर्माण यानाः ज्या न्ह्याकूगु खः । व्यक्तिया नामय् नामसारी जुयाः नं मी तकं धुंकूगु मध्यपुर थिमि नगरपालिका वडा नं ८ बोडेया उगु ऐतिहासिक कमलपुखूया जग्गा अदालतं सार्वजनिक पुखू हे कायम जुइगु फैसला छुुं ई न्ह्यः जक याःगु खः ।

अदालतपाखें उगु फैसला जुइवं नगरपालिकां पुखू संरक्षणया निंतिं गुरुयोजना दयेकाः ज्या न्ह्याकूगु खः । मध्यपुर थिमि नगरपालिकाया प्रमुख मदनसुन्दर श्रेष्ठं पुखू संरक्षण यायेगु ज्याया शिलान्यास यानादीगु खः । नगरपालिकाया करिब ८० लाख लागतय् पुखूया संरक्षण यायेगु नापं पुखू जःखः पःखालं ग्वयेगु ज्या शुरु जूगु दु ।

शिलान्यास यासें नगरप्रमुख श्रेष्ठं पुखू संरक्षणया निंतिं नगरपालिकापाखें बजेट विनियोजन यानागु जानकारी बियादिल । वय्कलं धयादिल, ‘थ्व पुखू धार्मिक व सांस्कृतिक महत्व कुबियाच्वंगु पुखू खः । थुकिया संरक्षण यासें डुंगा संचालन यानाः आन्तरिक व बाह्य पर्यटकया आकर्षणया केन्द्र दयेकेगु जुइ ।’नगरपालिकां पुखू संरक्षणया निंतिं पुखूया सिमांकन यायेगु ज्या सिधयेकाः आः पुखूया जःखः पःखालं ग्वयेगु ज्या न्ह्याकूगु खः ।