स्वास्थ्य व सौन्दर्यया निंतिं कस्ति व कागतिया रस
आयुर्वेदय् धयातःगु दु कि प्वाथय् खराब पदार्थया उत्पादन जुइ, गुगु म्हं पितछ्वये मफुत धाःसा उकिं थीथी ल्वय् जुइकी । कस्ति व कागतिया लिसें क्वाःलः त्वनाबिल धाःसा प्वाथय् च्वंगु विषाक्त पदार्थ पिहां वनी । अले थुकिं म्हयात पोषकतत्व सालाकायेत नं ग्वाहालि याइ । कागतिं म्ह छाँट वनाः बांलाकी ।
सुथय् लुमुलुमु धाःगु लखय् कागति तिस्सिनाः त्वनादिसँ । नियमित रुपं थ्व प्रयोग यानावं यंकादिसँ । कस्ति ख्वाःया निंतिं नं बांलाः । थ्व पानाबिल धाःसा ख्वालय् प्राकृतिक चमक खनेदइ । अले छ्यंगू फ्वफ्वः धाइगु नं मजुयावनी । कस्ति व कागतिया संयोगं स्वास्थ्ययात जक फाइदा याइगु मखसे छ्यंगूयात फाइदा नं याइ ।
आयुर्वेदय् वा मेगु गुगुं पुलांगु चिकित्सा पद्धतिइ अप्वः थें झिता ल्वय्या निंतिं छता हे पदार्थ छ्यलेगु याइ । तर थुकिया पाय्छि अःखः आधुनिक चिकित्सा प्रणालीइ झिता वासः वा पदार्थ ल्वाकछ्यानाः छता ल्वय्या उपचार यायेगु याइ । अथे जुयाः कस्ति, हलू, तुल्सी आदि नं थीथी ल्वय्या उपचारय् जक ज्या वइगु मखु, बरु थ्व सौन्दर्यवर्धकया रुपय् नं प्रयोग जू ।
आः झासँ, झीसं कस्ति व कागतिया फाइदा छु छु दु सिइके –
# सेखं चाल धाःसा कागति छगः बांलाक सिलाः छगू गिलास लखय् तयाः दायेकादिसँ । लः दालकि कागति लिकयाः तानादिसँ, अले थ्व हे क्वाःलःयात छगः गिलासय् तयाः कागति तिस्सिनादिसँ । थुकी छगू चम्चा पालुति, निगू चम्चा कस्ति ल्वाकछ्यानाः त्वनादिसँ, सेखं लनावनी ।
# कागति लखं सुथय् बहनी गललल यानादिसँ । थुकिं कथुइ थानाच्वंगु कफ नं ब्वलावइ । तसकं चर्को जुइक हे सेखं चायाच्वंगु दुसा छगू गिलास ग्वाराग्वारा दायाच्वंगु लखय् कागति छगःया रस व इच्छा कथं कस्ति ल्वाकछ्यानाः बहनी द्यने त्ययेकाः त्वनादिसँ ।
# स्येंस्यें वइगु समस्या दुसा कागतिया रस कस्तिइ ल्वाकछ्यानाः फ्ययाबिल धाःसा स्वँ बल्लाइ, अले स्येंस्यें वःगु क्वलाइ ।
#छगः कागतिया रस, चि भचा २५० मिली लुमुलुमु धाःगु लखय् ल्वाकछ्यानाः सुथय् खालि प्वाथय् त्वनाबिल धाःसा ल्ह्वनीगु कम जुइ । थ्व मदिक्क लछिनिसें निला तक कयादिसँ । थ्व गर्मिया मौसमय् अप्वः ज्या वः । यदि कस्ति नं ल्वाकछ्यायेगु खःसा अझ बांलाइ । थ्वयां लिपा न्हिनय् गबलय् गबलय् प्याःचाल, लखय् कागति, कस्ति तयाः त्वनादिसँ । छता खँ लुमंकादिसँ – यदि कस्ति ल्वाकछ्यायेगु खःसा चि ल्वाकछ्यानादीमते ।
# १२५ मिली लः दायेकाः लुमुलुमु धायेक ख्वाउँलकि स्वंगू स्वंगू चम्चा कागतिया रस व कस्ति ल्वाकछ्यानाः त्वनादिसँ । ल्ह्वनीगु कम जुइ । थ्व खालि प्वाथय् निला तक त्वनादिसँ । जा छक्वः जक नयेगु यानादिसँ । कसरत, योग, प्राणायाम न्हिं न्हिं यानादिसँ । चोकरया मरि, वाउँचा तरकारि भपियादिसँ । नये धुनेवं गुलि अप्वः क्वाःक्वाःगु लः त्वनेफु, निला तक त्वनादिसँ ।
# कस्ति, कागति व क्वाःलः स्वतां ल्वाकछ्यानाः त्वन धाःसा नयागु पचय् यायेगु शक्ति अप्वः दयावइ ।
# दुरुपाय् गुलिचा वल धाःसा कागतिया रस व कस्ति उति उति हे मात्राय् ल्वाकछ्यानाः दुरुपाय् पट्टि तयादिसँ ।
# कस्ति व कागति नितां छगू छगू चम्चा सवाः कथं बेय्चि भचा तयाः फ्ययाबिल धाःसा हिकु वयाच्वंगु दिनावनी ।
# दम थहां वल धाःसा क्वाःलखय् कागति तिस्सिनाः त्वंकाबिल धाःसा फाइदा जुइ । दमया ल्वगियात न्हिंन्हिं सुथन्हापां छगः कागति कस्ति निगू चम्चा व पालुति छगू चम्चा छगू कप पूपूगु लखय् हे त्वनाच्वन धाःसा यक्व फाइदा जुइ । थ्व दम थहां वयाच्वंगु इलय् कायेफइ । हृदयरोग, ब्लडप्रेसर, पाचन संस्थानया ल्वय् व बांलाःगु स्वास्थ्यया निंतिं फाइदाजनक जुइ ।
# छब्व पालुति, छब्व कागतिया रस, छब्व तुयुगु प्याजया रस – थ्व सकतां ल्वाकछ्यानाः छानय् यानाः सुथय् बहनी मिखाय् ताःई तक तयेगु यानाच्वन धाःसा मोतिबिन्दू मदयावनी । हिइसे च्वंसा गुलाबजल ल्वाकछ्यानादिसँ । थुकी १२ भाग गुलाबजल तयाः न्हिं न्हिं थुकथं हे तयाच्वन धाःसा मिखा त्यय्लानावइ, चश्मा नं तये म्वाःला वनेफु ।
# बागः कागति लखय् तयाः दायेकाः छगू कपय् तिस्सिनाः निगू चम्चा कस्ति तयाः ल्वाकछ्यानादिसँ । थुकथं तयार यानागु थज्याःगु निगू मात्रा सुथय् व बहनी कयादिसँ । थुकिं छितः मुसु वयाच्वंगु लंकाबी । कफ थानाच्वंगु दुसां ब्वलावइ ।
# छगू चम्चा कागतिया रस, थुलि हे मात्राय् कस्ति व पालुति ल्वाकछ्यानाः न्हिं स्वक्वः सेवन यानादिसँ । थुकिं प्वाथय् ग्यासया उत्पादन जुइकीमखु । लिसें छिगु ल्वय्लिसे ल्वायेगु क्षमता नं अप्वयावइ । छगू चम्चा इमूचुनय् छगू चम्चाया प्यब्वय् छब्व कागतिया रस ल्वाकछ्यानाः फ्ययादिसँ, ग्यासया समस्याय् आराम जुयावइ ।
# कस्ति व कागतिया रस उति उति हे मात्राय् ल्वाकछ्यानाः वाय् बुलाबिल धाःसा पायरिया ल्वचय् फाइदा जुइ ।
# छाति स्याइगु समस्या दुसा गाजर मनाः उकिया रस पिकयाः उगु रसय् कस्ति ल्वाकछ्यानाः त्वनादिसँ ।
LEAVE YOUR COMMENTS