इहिपा जुइ लछि न्ह्यः

थौंकन्हय् इहिपाया मौसम खः । इहिपाबलय् भमचा जुइम्ह मय्जुयात विशेष कथं छाय्पीगु झी सकसियां चलन खः । धाइ नापं दु नि, ‘भमचा थें बांलाका वल’ धकाः । तर अथे बांलाकेत इहिपा स्वयां छन्हु निन्हु न्ह्यः जक मेकअप यायेगु शुरु यायेगु धाःसा गलत खः । इहिपा जुइ लछि न्ह्यवंनिसें हे थुकिया तयारी यायेमाः । थुकिं यानाः छ्यंगू नाइसे, क्यातुसे च्वनाः बांलाइ, अले म्ह नं स्वस्थ जुइ ।

दकलय् न्हापां ला छिं फास्ट फूड व जंक फूड कम यायेमाली । अनंलि फक्व अप्वः सिसाबुसा व वाउँचा तरकारि नयेगु यायेमाः । थुकिं यानाः ख्वालय् बांलाःगु चमक वइ, अले अप्वःगु दाः कम जुयावनी । व नं स्वस्थ तरिकां गलत नसात्वँसाया लिच्वः छिगु छ्यंगुलिइ खनेदइ, अले बांमलाइ ।
ऊर्जा अप्वयेकेगु निंतिं मल्टिभिटामिन सप्लिमेन्ट कयादिसँ । गुकी भिटामिन, मिनरल, एमिनो एसिड दु, गुकिं छिगु छ्यंगूयात स्वस्थ याइ । अले तन्तुया पुनर्निर्माणया प्रक्रिया तच्वयेकी । अथे ला थ्व दक्वं छिं थुकिया प्राकृतिक स्रोत गथेकि सिसाबुसा, वाउँचा तरकारि, दुरु, ला आदिं नं प्राप्त यायेफइ तर गुलिं गुलिं मनूतय् पाचनक्रिया सुस्त गतिं जक जुइगु जुयाः थ्व सकतां खनिज प्राकृतिक रुपं कायेबलय् थुकिया असर भचा लिबाक जक खनेदइ ।
इहिपा जुइ स्वयां लछि न्ह्यः डीप क्लीजिब यानादिसँ (बाफ कयादिसँ) । थुकिं हिया संचार बांलाइ । अले छ्यंगू नाइसे क्यातुसे च्वनावइ । बाफ काये धुंकाः ख्वालय् ख्वाउँलखं छ्याप छ्याप यानादिसँ ।
इहिपा जुइ स्वयां लछि न्ह्यः गुलि अप्वः लः त्वनेफु लः त्वनेगु यानादिसँ । यदि छि आतकं नं यक्व लः त्वनेगु बानी मदुसा छुं खँ मदु, आः शुरु यानादिसँ ।
फेस मास्क, फेस प्याक तयादिसँ । थुकिया निंतिं सुं छम्ह ब्युटिसियनयात स्कीन टेस्ट याकादिसँ, अले सीकादिसँ कि उकिया टेक्सचर गथे च्वं, गुकथंया फेसप्याक छिगु छ्यंगूयात ल्वइ, व हे कथं फेस प्याक तयेगु याना यंकादिसँ ।
छक्वः ख्वालय् फेशियल याकेबलय् इहिपा स्वयां लछि न्ह्यःया थुगु अवधिइ छिगु छ्यंगूया रंग एकदम यचुइ । यदि छि च्वनेगु थाय्या जःखः बांलाःगु ब्युटिपार्लरया सेवा उपलब्ध मजूसा छेँय् थम्हं हे ख्वालय् बाफ कयाः फेसप्याक तयेफइ । फेसप्याक तयेगु झ्वलय् कपाय् छकू गुलाबजलय् थुनाः मिखाय् तयादिल धाःसा मिखाया सौन्दर्य थहां वइ ।
इहिपा स्वयां लछि न्ह्यः बहनी द्यने न्ह्यः ख्वाःया नियमित डीप क्लिजिंग यानाः तीजक तीजक मालिस यायेगु यानाच्वनकि छ्यंगूया मांसपेसिइ हिया संचार तीव्र जुयाः छ्यंगू नाइसे, पुष्ट चिंसे, ल्वःवनापुसे च्वनावइ ।
सुथ न्हापां दनाः रेफ्रिजेटरया ख्वाउँलखं ख्वालय् छ्याप छ्याप यायेगु यानाच्वन धाःसां नं छ्यंगू स्वस्थ जुइ ।
सुख्खा छ्यंगू खःसा साब्वं थानादीमते । मखुसा ख्वाः तज्याइगु व तुयूगु दाग वइगु सम्भावना दइ । सुख्खा छ्यंगुलिइ म्वाइश्चर तयादिसँ ।
ख्वाःया छ्यंगू अप्वः हे चिकं कंगु लात धाःसा तछ्वचुनय् कागतिया रस भचा तयाः ब्वब्व स्यानादिसँ । थुकिं यानाः इहिपा स्वयां न्ह्यः स्यःकै वइगु भय दइमखु ।
इहिपा जुइ स्वयां लछि न्ह्यः समाः यायेगु त्वतादिसँ, अथवा माल धाःसा एकदम हल्का जक समा यायेगु व लिपा तुरुन्त हे सिलाछ्वयेगु यानादिसँ ।
इहिपा जुइ स्वयां लछि न्ह्यः पुकातःगु नसाज्वलं नयेगु त्वःतादिसँ । सुथन्हापां दनाः कागति लखय् कस्ति तयाः खालि प्वाथय् त्वनादिसँ ।
ल्हाःया सुन्दरतां नं बांलाःगु प्रभाव त्वःती । थुकिया निंतिं स्वता चीज जरुरी जुइ । ल्हाःया छ्यंगू क्यातुगु जुइमाः, पतिंया आकार बांलायेमाः, अले लुसियात छाँट वंक समाः यानातःगु जुइमाः । थुकिया निंतिं इहिपा जुइ स्वयां लछि न्ह्यवंनिसें वसः हीगु, बँ पुइगु, भारा सिलेगु बन्द यानादिसँ । अथे यायेगु सम्भव मजूसा ज्या यायेबलय् रबरया पञ्जा न्ह्यायेगु यानादिसँ ।
इहिपा याये स्वयां लछि न्ह्यः बहनी द्यने त्ययेकाः न्हिं न्हिं पतिनय् कोल्ड क्रीम अथवा क्यूटिकल क्रीमं मालिस यायेमाः ।
भुतूज्या सिधये धुंकाः पतिंयात साब्वंया फिँजय् पलख थुना तयादिसँ । ल्हाःया छ्यंगू नाइसे च्वंकातयेगु छगू घरेलु उपचार थुकथं नं दु – इहिपा स्वयां लछि न्ह्यः न्हिं न्हिं ल्हापाय् छगू चम्चा चिनि व छगः कागतिया रस तयाः निपाः ल्हाः अबलय् तक ब्वब्व स्यानाच्वनादिसँ, गबलय् तक व चिनि दक्वं नायावनी मखु। चिनिया थासय् कस्ति छ्यःसां जिउ ।
इहिपा स्वयां निन्हु न्ह्यः हे दक्वं कथंया तयारी यायेमाः । छाय्कि इहिपा जुइकुन्हु थुकिया बारे बिचाः यानाच्वने मालकि तनाव जुइ । धाथें ला मानसिक शान्ति हे दकलय् तःधंगु सुन्दरता खः । चान्हय् न्ह्यः मवइगु जुल धाःसा द्यने न्ह्यः क्वाःगु दुरु छगू गिलास त्वनादिसँ । इहिपाया लछि न्ह्यःया ई छितः दुनें नं पिनें नं बांलाकेगु निंतिं तसकं महत्वपूर्ण ई जुइ, अथे जूगुलिं थ्व ईयात बांलाक छ्यादिसँ ।
अम्बःया प्रयोगं झीगु म्ह स्वस्थ जुयाच्वनी । न्हिं छगः अम्बः नियमित रुपं दुरुलिसें खालि प्वाथय् कायेगु यात धाःसा थुकिं छिगु छ्यंगूया यक्व हे फाइदा याइ ।
अक्सर छु खनेदु धाःसा इहिपा जुइगु न्हि सतिनावलकि भमचा जुइम्हेसिया ख्वालय् स्यःकै पिहां वयाबी, गुकिं यानाः सौन्दर्यय् लिच्वः लाइ । अथे जूगुलिं इहिपा जुइ स्वयां लछि न्ह्यवंनिसें विशेष रुपं सन्तुलित भोजन यायेमाः ।
छ्यंगूयात नाइसे क्यातुसे व चमकदार दयेकां जक मगाः उकियात वातावरणं जुइगु हानीपाखें नं बचय् यायेमाः । उकिं पिने चाःहिउे वनेबलय् विशेष रुपं छिं भिंगु सनस्क्रिन छ्यलेगु यायेमाः । अज्याःगु सनस्क्रिन क्रिमं निभाःजलं जुइगु नोक्सान पाखें रक्षा याइ ।
छ्यंगूयात नाइसे च्वंकातयेत थ्व इलय् न्हापांनिसें छ्यला वयाच्वनागु क्रीम हे जक छ्यलादिसँ । झन बांलाःगु धाल धकाः व इलय् न्हूगु क्रीम छ्यलेगु रिस्क कयादीमते । छाय्कि उगु क्रीम बांलाःसां छिगु छ्यंगूयात मत्वःगु नं जुइफु ।
इहिपा स्वयां लछि न्ह्यवंनिसें हे नियमित चिकं व लैचाया छ्यलाबुलां छिगु सँयात बांलाकाबी ।
थःगु म्हुतुसिया बिचाः यायेत न्हियान्हिथं लिप बाम तयादिसँ ।
मिखाया क्वसं डार्क सर्कल मदयेकाछ्वयेत उपाय यानादिसँ । इहिपा स्वयां लछि न्ह्यः तुसिचाः मिखाय् दिकातयेगु नं छगू बांलाःगु उपाय जुइफु ।
छवाःया छक्वः स्क्रब अवश्य यानादिसँ । थुकिं मृतकोष पाखें मुक्ति बी । अले छ्यंगू बांलाइ, चमक नं दइ । तर छ्यंगू सम्बेदनशील खःसा भचा सावधान जुयादिसँ ।
इहिपा स्वयां लछि न्ह्यः नियमित योग यानादिसँ, अथवा जिम ज्वाइन यानादिसँ । थुकिं यानाः छिगु म्ह ल्वःवनापुसे च्वंक बांलाइ । छिगु म्हया तौल अप्वयाच्वंगु दुसा हलुका ब्यायाम यानाः गंसि यायेगु कुतः यानादिसँ । डाइटिंग यानादीमते । सन्तुलित व हेल्दी नसाज्वलं भपादिसँ ।
यदि छि गुगुं न्हूगु हेयरकट प्रयोग यायेगु बिचाः यानादियासा लछि न्ह्यः हे यानादिसँ । लिपा छुं कथंया न्हूगु एक्पेरिमेन्ट यायेबलय् छितः तसकं मल्वःगु नं लायेफु । सँया सुसाःकुसाः नं लछि न्ह्यवं निसें हे यानादिसँ ।