केराय् दुगु वासःया गुण

केरा छताजि अज्याःगु फल खः, गुगु दछियंकं न्ह्याथासं उपलब्ध जुयाच्वंगु दयाच्वनी । तसकं हे गुणकारी व पौष्टिक जुइगु थ्व फल मचांनिसें बुराबुरिं तक न्ह्याम्हेसिनं नं नयेफु ।

प्रति १०० ग्राम तौलया केराय् दइगु पोषक तत्वय् १७ मिग्रा क्याल्सियम, ३६ मिग्रा फस्फोरस, ७७ मिग्रा पोटासियम, ७८ माइक्रोग्राम भिटामिन ए (क्यारोटिन), ७ मिग्रा भिटामिन सी, १–२ ग्राम प्रोटीनया लिसें महत्वपूर्ण एन्जाइम, सल्फर, सिजः, भिटामिन बी व मेमेगु भिटामिन नं माक्व दइ ।

पाके जूगु १०० ग्राम केराय् २० प्रतिशत चिनि व ११६ क्यालोरि ऊर्जा दइ । केराय् अःपुक पचे जुइगु चिनि गाक्क दइ । थुकी छुं भचा मात्राय् भिटामिन डी, ई, जी व बांलाःगु मात्राय् म्याग्नेसियम व सल्फर दइ ।

केरा नयाया फाइदा
# केरा नल धाःसा म्हय् क्याल्सियम, फस्फोरस व नाइट्रोजनया बांलाःगु भण्डारण जुइ, गुकिं बल्लाःगु व न्हूगु टिश्यूया निर्माण जुइ ।

# आतापुतिइ छुं कथंया ल्वय् जुल धाःसा ल्वगियात बीगु नसाज्वलंया रुपय् केरा बी, छाय्कि ला तसकं नाइसे व चुलुसे च्वनी । थुकी छताजि अज्याःगु रसायन दु, गुकियात आःतक नां हे बीमफुनि । गुलिगुलिसिनं थुकियात भिटामिन ‘यू’ अर्थात ‘अल्सरया विरोधी’ धकाः धकाः नं धाः ।

# केरा डाइटरी फाइबरया तसकं तःधंगु स्रोत खः । छपु मध्यम आकारया केराय् छितः थ्यंमथ्यं ३ ग्राम फाइबर चूलाइ, गुगु छिगु न्हियान्हिथंया आवश्यकताया १० प्रतिशत खः । फाइबर दइगु जुयाः थ्व प्वाःया गुलिखे ल्वचय् ज्या वः । खास यानाः लः थें छ्वाल्लुक खि वइगु ल्वय् जुइबलय् निपु केरा धौलिसे नयाबिल धाःसा आराम जुइ ।

# छता थ्व हे जक अज्याःगु फल खः, गुगु अल्सरया पुलांगु मामलाय् नं प्राकृतिक रुपं नयेफु । थ्व थीथी पाचक रसं स्वयां अप्वः एसिड न्हंकाछ्वयेत सक्षम जू । अले प्वाःया दुनेया अंगलय् छफी फिचिनाः अल्सरया खराबी कम याइ ।

# पाके जूगु केरां तपुगु आतापुतिइ घालं यानाः मनावःगुया उपचारय् यक्व ग्वाहालि याइ ।

छु ल्वय् गथे यानाः लंकी ?

कब्जियत व झारा ः
पाके जूगु केरां तपुगु आतापुतिया ज्यायात सामान्य दयेकाबी । कब्जियतया उपचारय् केरा ज्या वइगु कारण थ्व खः कि थुकी ‘पेक्टिन’ नांगु रसायन, कुगाक्क दइ । थुकिं लः त्वनाकाइ । केरां आतापुतिइ दयाच्वंगु हानिकारक ब्याक्टेरियायात भिं याइगु जीवाणु एक्डीडोफिलस बेसिलीइ हिलाबी ।

किडनीया ल्वय्
केराय् प्रोटीन व चि म्हो जक दइ, तर कार्बोहाइड्रेट्सया मात्रा आपाः दइ । छता ल्वय् गुकी किड्नीइ हि मुनाः व किडनीं बांलाक ज्या मयानाः विष दयावइगु खः, थुकिया उपचारय् नं केरा तसकं ज्या व  । थथे जुइबलय् ल्वगियात न्हिं च्यापु गुपु केरा स्वन्हु तक नकाबीमाः । थ्व बाहेक ल्वगियात मेगु छुं नं मनकेगु यायेमाः, थ्व उपचार नेफ्राइटिस लिसें किड्नीया दक्वं ल्वचय् सफल जूगु दु ।

हि मगाइगु ः
केराय् आइरन यक्व मात्राय् दइ । अथे जुयाः हि मगाइगु ल्वय् मजुइकेत केरां साप हे ग्वाहालि याः । थुकिं हिइ ह्याउँगु कोष अप्वयेकाबी ।

टिबी ः
टिबी (क्षयरोग) या उपचारय् नं केरा ज्या वः ।

थीमज्यू जुइबलय् ः
कचिगु केराया तरकारि दयेकाः उकिया सेवन धौलिसे यानाबिल धाःसा थीमज्यू जुइबलय् प्वाः स्याइगु व यक्व हि कुहां वइगुयात पनेफइ । धयातःकथं केराया स्वां (केराबुंगा) मिसातय्के प्रेजिष्टिटेन हारमोन्सया वृद्धि याइ, गुकिं यानाः थीमज्यू जुइबलय् अप्वः हि कुहां वइगु जुइमखु ।

भुयू कुहां वइगु ः
थ्व ल्वय् दुपिंसं जा नयाः घौछिति लिपा छपुनिपु केरा नयाः वयां लिपा छगू कप दुरुइ निगू चम्चा कस्ति संकाः छुं न्हि तक मदिक्क त्वनेगु यायेमाः । थुगु प्रयोगं भुयू कुहां वइगु ल्वय् लनावनी । थुकथं हे केरा व दुरुया खीर नयेगु अथवा सुथय् बहनी निपु केरा घ्यः भचालिसे नयाबीगु यात धाःसा नं भुयू कुहां वइगु ल्वय् लनावनी ।

तागत दयेकेत ः
केरा छताजि पौष्टिक फल खः । गंसिपिंत, टाइफाइड ज्वरया ल्वगियात व अम्लपित्त (हाइपरएसिडिटी)या ल्वगियात केरा उत्तम फल खः ।

ज्वर वइबलय् ः
ज्वर वइबलय् केरा नल धाःसा म्हुतु गनीमखु, लिसें म्हय् कमजोरी नं वइमखु ।

गंसिपिंत ः
गुम्ह मनू सितिकुति जुइक गंसिम्ह खः, अले वया भतिचा म्ह ल्ह्वंकेमाःगु दु धयागु खःसा वयात निपु केरा छगू गिलास दुरुइ तयाः सुथय् वा बान्हि जायेकाः निला स्वला तक नकाबीमाः ।

क्वँय् बल्लाकेत ः
केराय् पोटिशियम कुगाक दइ, गुगु क्वँय्या निंतिं अति आवश्यक तत्व खः । म्हय् पोटाशियम गाकातयेत बुरा व मस्तय्सं न्हिं न्हिं हे केरा नयेगु यायेमाः ।

नये पित्याः मजुइकेत ः
सुं मनूयात याकनं याकनं तसकं हे नयेपित्याइगु समस्या जुयाच्वन धाःसा केरा नयेगु यायेमाः, समस्या ज्यनी ।

मिं पूसा ः
मिं पूथाय् केरा इलाबिलकि सिचुसे च्वनी । थुकिया निंतिं छकू सफागु ‘स्टेरिलाइज्ड’ कापतय् पाके जूगु केराया ला बांलाक न्हायाः इलादिसँ । थ्व कापःयात ल्वगिया म्हय् गन पूगु खः, अन प्यपुंक तयादिसँ । प्यघौया छक्वः छक्वः थ्व कापः हिलादिसँ । पीडित व्यक्तियात तसकं सिचुइ । खुराकया रुपय् नं पाके जूगु केरा दुरुइ संकाः व कस्तिइ ल्वाकछ्यानाः बियादिसँ, याकनं हे फाइदा खनेदयावइ ।

स्याःसा ः
म्हय् गनं स्यानाच्वंगु दुसा उगु थासय् केराया ख्वला तयाः ३० मिनेट त्वःतातयादिसँ, याउँसे च्वनावइ ।

सौन्दर्य थकायेत
सौन्दर्य थकायेत केराया ख्वलायात हल्का ल्हातं ख्वालय् ५ मिनेट तक ब्वब्वस्यात धाःसा स्यःकै मदयावनी । थुकिया ख्वलाया पेस्ट दयेकाः ख्वालय् बुलाबिल धाःसा ख्वाः थिनावइ ।

किलं न्याःसा ः
ब्वकी अथवा छुं नं किलं न्यानाः चासुक फ्वंगात धाःसा केराया ख्वला निनाः पानादिसँ, याउँसे च्वनी ।

सोराइसिस ः
सोराइसिस जुल धाःसा केराया ख्वला निनाः पानादिसँ, थुकिं दाग नं वंकी, आराम नं जुइकी ।

मिखा त्यानुसा ः
मिखा त्यानुयावल धाःसा केराया ख्वला घौपलख मिखाय् दिकातयादिसँ, याउँया वनी ।

ला हय्हय्कुंसा ः
ख्येँया म्हासुग्वलय् केराया ख्वला ल्वाकछ्यानाः ख्वालय् ५ मिनेट तक बुलातयादिसँ । अनंलि ख्वाः सिलादिसँ । थथे नियमित यानादिसँ, ला हय्हय्कुंगु कम जुयावनी ।

छ्यंगूया सामान ः
लेदर ब्याग, बेल्ट वा लाकां भद्दा खनेदयावल धाःसा उकी केराया ख्वलां बुलादिसँ, पालापाला थिनावइ ।

सम्बन्धित बुखँ

LEAVE YOUR COMMENTS