थीमज्यू जूइबलय् प्वाः मस्याकीगु आहार
मिसातय्त त्यानुइगु, मनावइगु, छ्यं स्याइगु थेंज्याःगु समस्यां न्ह्याबलें हे लित्तुलिनाच्वनी । पीरियड्स अर्थात थीमजिउ जुइबलय् प्वाः स्याइगु नं छगू अज्याःगु हे समस्या खः । अथे ला छुं छुं नसा ज्वलनं झीत यक्व हे फाइदा बीफु, अले महिनावारीया थीथी लक्षणं मुक्त यायेत ग्वाहालि यायेफु । झासँ, उकिया बारे सिइके —
सिमि व मटरकःछे
पीरियड्सया झ्वलय् पाचनतन्त्र अनियमित जुयावनी । फाइबर गाक्क दुगु सिमि व मटरकःछें पाचनतन्त्रयात नियमित यायेत ग्वाहालि याइ । सिमिइ म्याग्नेसियम नं कुगाक्क दइ, गुकिं नुगःस्येँलिसे स्वानाच्वंगु थीथी ल्वय् जुइगु खतरा यक्व हे कम जुयावनी । सिमि नयेबलय् ऊर्जाया स्तर नं बांलाइ, अले थुकिं आइरन मगाइगु नं मजुइकाबी ।
डार्क चकलेट
डार्क चकलेटय् गुलिखे अज्याःगु पोषक तत्व दइ, गुगु स्वास्थ्यया निंतिं यक्व हे बांलाःगु खः । गुलिखे रिसर्चं सिइदये धुंकूगु दु कि डार्क चकलेटं सेरोटोनिनया स्तर थकयाबी, गुकिं त्यानुगु व डिप्रेसनयात कम यायेत ग्वाहालि याइ । उकिं पीरियड्सया झ्वलय् डार्क चकलेट नयेगुलिं छितः फाइदा हे याइ ।
कार्बोहाइड्रेट
फल, तरकारि व चु मबूगु अन्नं पीरियड्सया इलय् राहत प्रदान याइ । मेमेगु कम्प्लेक्स कार्बोहाइड्रेट समृद्ध खाद्य पदार्थय् खोर्पानि, सन्तरासि, पासि, तुसि, गाजर व कःनि नं लाः ।
लः
अथे ला लः अनिवार्य रुपं आहार मखु । तर छिगु पीरियड्सया इलय् आहारया छगू मदयेक मगाःगु घटक खः । लखं अप्वःगु सोडियमयात पितछ्वइ, गुगु मनावइगु व छ्यं स्याइगु (माइग्रेन)या कारण जुइ । उकिं छिं फक्व अप्वः लः त्वनादिसँ ।
भिटामिन सी
भिटामिन सी मिसातय्गु निंतिं ख्येँ व प्रजनन प्रणालीया गुणस्तरया निंतिं बांलाः । सन्तरासि व कागति भिटामिन सीया बांलाःगु स्रोत खः ।
क्लाल्सियम
छगू अध्ययनं सीदु कथं मिसातय्त १२०० मिलीग्राम क्याल्सियम माः । छिं थःगु आहारय् ब्रोकोली व धौ दुथ्याकेगु कुतः यानादिसँ । धौ व एन्टिअक्सिडेन्ट गाक्क दुगु फल गथे कि मेवा, अं आदि सेवन यानादिसँ । अथे हे छिं थःगु आहारय् हाम्वः नं दुथ्याकादिसँ । थ्व नं क्याल्सियम गाक्क दुगु पदार्थ खः ।
भिटामिन बी ६
थ्व भिटामिन अद्भुत स्ट्रेस बस्टर खः । थुकिं छिगु मानसिक अवस्था बांलाकातइ । थुकिं मनावइगुयात नं पनी । आलु, केरा व सत्तु भिटामिन बी ६ प्रशस्त दुगु आहार खः ।
भिटामिन ई
भिटामिन ईं पीएमएसया थीथी लक्षणयात मदयेका छ्वयेत ग्वाहालि याइ । थ्व छिगु छ्यंगूया निंतिं नं बांलाः । थुकिया आहार स्रोतय् एभोकाडो व ख्येँया म्हासुग्वः दुथ्याः ।
पीरियड्सय् पथपरहेज
पीरियड्सय् परहेज छु छु चीजयागु यायेमाः धयागु खँय् नं ध्यान बीमाः । महिनावारी जुइबलय् प्वाः म्वय्म्वय् द्याक स्याइगुयात पनेत च्वय् न्ह्यथनागु नसाज्वलयां सेवनं ग्वाहालि याइ । अतिरिक्त डेरि उत्पादपाखें बचे जुयादिसँ, छाय्कि थुकिं प्वाः स्याकी । चि व चिनि यक्व दुगु नसाज्वलं नं भपादीमते । अय्लाः व रेड मिट नं बांलाः मजू, छाय्कि थुकिं छिगु प्वाथय् समस्या हयाबी ।
LEAVE YOUR COMMENTS