ने. सं. ११४४ ञलाथ्व दशमी -

छाय् यात दाहालं थ्व खुलासा ?

येँ – नेकपा अध्यक्ष पुष्पकमल दाहालं झिंन्यालाया दुने वर्तमान प्रधानमन्त्री केपी ओलीं थःत सत्ता हस्तान्तरण याइ धकाः धयादीगु दु । केपी ओली नेपाः मदुगु पालय् लाकाः छगू टेलिभिजन लिसे जूगु खँल्हाबल्हाय् अध्यक्ष दाहालं उगु खँया खुलासा यानदीगु खः । वय्कलं पार्टी एकता जूगु इलंनिसें ओली व थः दथुइ पालंपाः प्रधानमन्त्री जुइगु लिखित सहमति जूगु धासें ओलीं उगु सहमति पालना याइगु विश्वास नं प्वंकादीगु दु ।

तर दाहालया उगु धापू वयेवं गनं पार्टी दुनेया आन्तरिक समीकरण मिले मजूगु जकं खःला धइगु आशंका नं याना हःगु दु । पार्टी एकीकरण जुइधुंकाः दाहालं अतिकं विश्वास यानातःपिं छुं नेतात थौंकन्हय् दाहाल खेमा त्वःताः ओली खेमाय् वंगुलिं पार्टी दुने घुर्की क्यनेगु निंतिं दाहालं थज्याःगु खँ हःगु खइला धइगु विश्लेषण नं शुरु जूगु दु ।

न्हापा प्रचण्ड खेमाय् दुम्ह गृहमन्त्री रामबहादुर थापा थौंकन्हय् ओली खेमाय् वनाच्वंगु दु । अथेहे ऊर्जा मन्त्री वर्षमान पुनः व मेम्ह नेता जनार्दन शर्मा नं ओली खेमाय् वनाच्वंगु खँ पिहां वःगु दु । मेखे वरिष्ठ नेता माधवकुमार नेपाल, झलनाथ खनाल लिसें पूर्व एमालेया छुं छुं नेतात धाःसा थौंकन्हय् दाहाल निकट जुयाच्वंगु दु ।

पार्टीया पोलिटब्युरो दुने गुम्ह दुजः दुसा उकी न्याम्ह दुजः दाहाल पक्षय् दुसा प्यम्ह प्रम ओली पक्षय् दु । उकिं मेगु खेमाय् वंपिं प्रभावित यायेगु लागिं दाहालं थः पार्टीया अध्यक्ष वा प्रधानमन्त्री जुइफु धकाः क्यनेगु लागिं थथे न्ववाना हःगु अनुमान दु ।