
येँ- बागमति प्रदेशया मुख्यमन्त्री अष्टलक्ष्मी शाक्यं नेवाःतय्गु भाषा, कला, संस्कृति, लिपि आदिया संरक्षण यायेमाःगु दु धासें उकिया निंतिं ग्वाहालि यायेगु खँ धयादीगु दु ।
मुख्यमन्त्री शाक्यं भाषा, कला, संस्कृति, लिपि ल्यनाच्वन धाःसा हे जक जातिया नं म्हसीका ल्यनाच्वनी धयादिल ।
मुख्यमन्त्री शाक्यं आः नकतिनि नेवाः पत्रकार राष्ट्रिय दबू, येँ जिल्ला कचापाखें थनया लखुतिर्थय् च्वंगु थःगु हे ज्याकुथिइ ग्वसाः ग्वःगु छगू ज्याझ्वलय् नवासें उगु खँ धयादीगु खः। वय्कलं थुपिं सकतां ल्यंका तयेगु ज्याय् मातृभाषाया पत्रकारिता ख्यःया नं आपालं योगदान दयाच्वनीगु खँ धयादीगु दु । लिसें वय्कलं नेवाः जाति जक मखसे बागमति प्रदेशय् दुगु बहुसंख्यक तामाङ व अल्पसंख्यक जिरेल, चेपाङ लगायतया जातिया विकास, उन्नति व उत्थानया निंतिं प्रदेश सरकारपाखें ग्वाहालि यायेगु खँ धयादीगु दु ।
पत्रकार दबू येँ जिल्ला कचाया अभिनन्दन ग्रहण यासें मुख्यमन्त्री शाक्यं आः राजनीतिक परिस्थिति स्थिर जुल धायेवं विकास निर्माणया ज्या नं न्ह्याः वनी धयादिल । थ्व इलय् प्रदेश सरकार प्रमुखया दायित्व कोरोना भायरस संक्रमणया रोकथाम व नियन्त्रणय् केन्द्रीत जुयाच्वंगु नं वय्कलं धयादिल । लिसें मेलम्ची व हेलम्बुइ तत्काल प्रदेश सरकारपाखें सतक संजाल विकास यायेत ज्या न्ह्याकेत्यनागु नं उगु इलय् वय्कलं जानकारी बियादिल ।
उगु इलय् दबूया येँ जिल्ला कचाया पदाधिकारी दुजःपिंलिसें येँ महानगरपालिका १५ वडाया थीथी संघसंस्थापाखें नं मुख्यमन्त्री शाक्यया कार्यकालया सफलताया कामना यासें भिंतुना बिउगु खः ।
लुमंकेबहजू, नेवाः पत्रकार राष्ट्रिय दबू येँ जिल्ला कचापाखें छुं दिं न्ह्यः जक मुख्यमन्त्री शाक्ययात नाप लानाः नेवाः प्रेस काउन्सिलया माग याःगु खःसा उगु इलय् वय्कलं थः नकतिनि जक मुख्यमन्त्री जुयागुलिं थ्व विषयय् अध्ययन यानाः जानकारी याकेगु जुइ धयादीगु खः ।
LEAVE YOUR COMMENTS