स्थिर सरकार वल, लगानी मवः

येँ – देशय् स्थायी सरकार वःसां वैदेशिक लगानी दुहां वइगु वातावरण धाःसा अझं तयार मजूनि धासें विज्ञतय्सं चिउताः प्वंका हःगु दु । थुकिं यानाः आः वइगु चैत्र महिनाय् सरकारं यायेत्यंगु अन्तर्राष्ट्रिय लगानी सम्मेलन समेत सफल मजुइगु चेतावनी उमिसं बिउगु दु । देशय् स्थिर सरकार वयेधुंकूगु जुयाः आः वैदेशिक लगानी दुहां वःसां जिल धइगु सन्देश विश्वन्यंकंया लगानीकर्तातय्त छ्वयेगु ताः तयाः सरकारं चैत्र महिनाय् थ्व सम्मेलन यायेत्यंगु खः ।

तर विज्ञतय्सं धाःसां स्थिर सरकार वःसां लगानीया लागिं स्थिर नीति अझं मवःनि धासें आःयात सरकार उकी नं स्पष्ट जुइमाःगु बिचाः तया हःगु दु । नेपालय् सञ्चालित ततःधंगु जलविद्युत परियोजना (खास यानाः बूढीगण्डकी) गबलें छगू कम्पनीयात बीगु धाइसा हानं गबलें मेगु कम्पनीयात बीगु धाइगु कारणं नेपालय् लगानी यायेत विदेशीत अझं ग्यानाच्वंगु खँ धाःगु दु ।

नापं नेपालय् लगानी यानाः कमे जूगु ध्यबा सुरक्षितपूर्वक थःगु देशय् लित यंके खनी धइगु खँय् नं ढुक्क जुइ फइगु अवस्था मदुगु खँ उमिसं धाःगु दु । थज्याःगु कारणं यानाः नेपालय् लगानी सम्मेलन या हे याःसां अन लगानी दुहां वइगु सम्भावना म्हो जक दुगु दावी नं उमिसं याःगु दु । नेपाल सरकारं निदँ न्ह्यः नं थज्याःगु हे छगू लगानी सम्मेलन याःगु खः ।

करोडौं दां खर्च यानाः ग्वसाः ग्वःगु उगु सम्मेलनय् विश्वया थीथी देय्या लगानीकर्तातय्सं १३ अर्ब डलर बराबरया लगानी यायेगु प्रतिवद्धता प्वंकूगु खः । तर आः तक उकी ४ अर्ब तकाया लगानी बारे खँ जुयाच्वंगु दु, मेगु ला बेपत्ता हे जुइधुंकल । बरु अबले निदँ न्ह्यः सिबें आः तकया दुने २५ प्रतिशत वैदे–शिक लगानी म्हो जुइधुंकूगु तथ्यांक सार्वजनिक जूगु दु ।

सम्बन्धित बुखँ

LEAVE YOUR COMMENTS