ने. सं. ११४४ कौलाथ्व पारू - नःलास्वनेगु

दोषी सुयातं त्वःते मखु ः श्रेष्ठ

येँ (नेपालभाषा टाइम्स)- बालुवा– टारस्थित ललिता निवास जग्गा प्रकरणय् सुयातं मत्वःतेगु खँ उपप्रधान लिसें गृहमन्त्री नारायणकाजी श्रेष्ठं धयादीगु दु । म्हिगः सञ्चारकर्मीतलिसे नापलायेगु झ्वलय् वय्कलं उगु खँ धयादीगु खः । वय्कलं जग्गा हिनामिनाय् दुथ्याःपिं न्ह्याग्गु हे ओहदाया जूसां नं कारबाहीया दायराय् हयेगु खँ नं धयादीगु

वय्कलं तथ्य व प्रमाणं क्यंपिं मनूतय् विरुद्ध अनुसन्धान यानाः कारबाही यायेत प्रहरीयात स्पष्ट रुपय् निर्देशन बीधुनागु धासें धयादिल, ‘ललिता निवास जःखःया जग्गा सरकारयागु हे खः । छानविन व प्रहरी अनुसन्धानं थ्वहे खँयात स्पष्ट यानाच्वंगु दु, थ्व अपराधय् दुथ्याःपिंत कारवाहीया दायराय् हयेगु जुइ । भ्रष्टाचार नियन्त्रण व सुशासन कायम यायेत सरकार निरन्तर न्ह्यानाच्वंगु दु ।’

वय्कलं देशय् राजनीतिक हिउपाः वःसां नं भ्रष्टाचार नियन्त्रण, सुशासन व स्वदेशय् ल्याय्म्हत च्वनेगु वातावरण दयेके मफु धासें उकिया नितिं सरकारं वातावरण दयेकेगु कुतः यानाच्वनागु खँ नं धयादीगु दु ।

उकथं हे वय्कलं अनुसन्धान यानाच्वंपिं प्रहरीयात नं दोषी त्वःमफीमा व निर्दोष मलायेमा धकाः निर्देशन बियागु खँ धासें अनुसन्धानया झ्वलय् सुयात ज्वनेगु कि मज्वनेगु वा अनुसन्धान यायेगु कि मयायेगु धकाः थःत न्यनेम्वाः धकाः प्रहरीयात निर्देशन बियागु खँ नं कनादीगु दु ।