मेलम्ची दयेकेत ७ अर्ब २९ करोड

येँ – सरकारं मेलम्ची खानेपानी आयोजना निंतिं ७ अर्ब ३९ करोड बजेट फ्याःगु दु । मेलम्चीया ल्यं दनिगु ज्या क्वचायेकेगु निंतिं उगु बजेट फ्याःगु खः । मेलम्चीया ल्यं दनिगु ज्या ब्वथलाः ठेक्काय् बीगु तयारी जुयाच्वंगु दु । मेलम्ची आयोजना थीथी खण्डय् ब्वथलाः क्वचायेकेगु निंतिं मन्त्रिपरिषदं अनुमोदन यायेधुंकूगु दु ।

अर्थमन्त्री डा. युवराज खतिवडां प्रतिनिधि सभा व राष्ट्रिय सभाया मंकाः बैठकय् न्ह्यब्वःगु बजेटय् मेलम्ची आयोजनायात फ्याःगु दांया विवरण नं न्ह्यब्वयादीगु खः । मेखे मन्त्रिपरिषदं मेलम्ची ठेक्का बीगु जिम्मा सञ्चालक समितियात बिउगु दु । मन्त्रिपरिषदया बैठकं मेलम्चीया ज्या विशेष परिस्थिति अनुरुपया कानुनी आधारय् न्ह्यःने न्ह्याकेगु निर्णय याःगु खः ।

इटालियन कम्पनी सीएमसी मेलम्चिया ज्या दथुइ हे त्वःताः लिहां वनेवं आयोजनाया ज्या ठप्प जुयाच्वंगु खः । सरकारं धाःसा नीति तथा कार्यक्रमय् दछिया दुने मेलम्चीया लः येँ हयेगु खँ न्ह्यथनातःगु दु ।सीएमसीं पुस २ गते कम्पनीइ आर्थिक संकटय् वःगु धासें ठेक्का त्वाःदःगु पौ सरकारयात लःल्हानाः ज्या त्वःतूगु खः ।

वयां लिपा मेलम्चीया ज्या थाँती लानाच्वंगु दु । सार्वजनिक खरिद नियमावलीया १४५ कथं ज्याया प्रकृति कथं थीथी प्याकेज दयेकाः ठेक्का बीफइगु व्यवस्था दु । थ्व विशेष परिस्थितिइ अज्याःगु निर्णय यायेफइ ।

‘ऐनया दफा ६६ कथं छुं नं सामान न्यायेबलय् सार्वजनिक निकायं न्यायेमाःगु आवश्यकताया लिखित विवरण, गुणस्तर, परिमाण, शर्त व ज्या क्वचायेकेगु ई थेंज्याःगु विवरण तयार यानाः आकस्मिक परिस्थितिया सामना यायेमाःगु परिमाण व ईया लागि जक यथासम्भव प्रतिस्पर्धा याकाः वा छगू जक निर्माण व्यवसायी, आपूर्तिकर्ता, परामर्शदाता वा सेवा प्रदायकलिसे लिखित दरभाउ वा प्रस्ताव कयाः स्वच्छ व उचित भाःया निंतिं वार्ता यानाः न्यायेमाः’ दफा १४५ सं धयातःगु दु ।

थुगु व्यवस्था कथं झिगू लाख तका स्वयां अप्वः ध्यबाया सामान न्याःगु जूसा अज्याःगु निकायं उकथं न्याःगु विवरण सार्वजनिक सुचं पिकायेमाः । उकिया जानकारी सार्वजनिक खरिद अनुगमन कार्यालयं छ्वयेमाःगु व्यवस्था दु ।

सम्बन्धित बुखँ

LEAVE YOUR COMMENTS