भृकुटीमण्डपय् नाडा अटो शो

येँ – सवारी साधन व उकिया लिसे सम्बन्धित सामग्री व सेवाया मेला ‘नाडा अटो शो’ म्हिगःनिसें येँया भृकुटीमण्डपय् न्ह्याःगु दु। अटो शोया उलेज्या अर्थमन्त्री डा. युवराज खतिवडां यानादीगु खः ।

उलेज्या ज्याझ्वः लिपा न्ववायेगु झ्वलय् अर्थमन्त्री खतिवडां सवारी साधन नेपाःया निंतिं आवश्यकता खःसां नं उकिया परिमाण क्वःछीमाःगु खँ धयादीगु दु। वय्कलं सरकारया प्राथमिकता सार्वजनिक सवारी व उकी नं विद्युतीय जुइगु खँ नं कनादिल । वय्कलं धयादी, ‘हाइब्रिड वा जैविक इन्धनं चले जुइगु सवारी साधन सरकारया प्राथमिकता खः ।’

अथे हे वय्कलं सवारी साधन झिदँया दुने प्यंदुगं अप्वःगु धासें आः स्याचुरेशन थ्यंगु खँ धयादिल । उकिया कारण हे बजाः सुस्त खनेदुगु खँ धासें झिदँया दुने व्यवसायी गाक्क कमे यायेधुंकल जुइ धयादिल ।

वय्कलं आः भ्यालु एड यायेगु कथं एसेम्बलिब प्लान्ट दयेकेत नं व्यवसायीयात इनाप यानादिल । उकिया निंतिं सरकार संरक्षण व सहजीकरण यायेत तयार दुगु खँ वय्कलं धयादिल । वय्कलं व्यवसायीतय्सं सरकारयात छले यायेगु ज्या यानाच्वंगु धासें अज्याःगु ज्या मयायेत नं इनाप यानादिल । वय्कलं सवारी साधनय् अप्वः भन्सार म्हयाच्वनागु स्वीकार यासें राजस्वया स्रोत व प्राथमिकता हिला वन धाःसा भन्सार दर नं म्हो जुइगु खँ कनादिल ।

न्यान्हु तक न्ह्याइगु मेलाय् नाडाया अध्यक्ष शम्भुप्रसाद दाहाल, नेपाल उद्योग वाणिज्य महासंघया वरिष्ठ उपाध्यक्ष शेखर गोल्छा, वस्तुगत महासंघया उपाध्यक्ष उमेशलाल श्रेष्ठपिंसं नं सम्बोधन यानादीगु खः ।