दफ्टर क्लबया भवन शिलान्यास

येँ – येँ महानगरपालिका २३ वडाया दफ्टरय् दफ्टर क्लब भवनया शिलान्यास याःगु दु । येँ क्षेत्र नं. ८या प्रतिनिधिसभा सदस्य जीवनराम श्रेष्ठं भवनया शिलान्यास यानादीगु खः । भवन शिलान्यास यानादिसें सांसद श्रेष्ठं क्लब भवन सकसिगुं मंकाः थाय् जूगु धासें सामाजिक सेवाया ज्याय् थुकिया उपयोग जुइगु खँय् थः विश्वस्त दु धयादिल ।

नेपाल ओलम्पिक कमिटीया अध्यक्ष तकं जुयाच्वनादीम्ह सांसद श्रेष्ठं त्वाःयात बांलाकेत मंकाःकथं सहलह ब्याका वनेगु नाप ल्याय्म्ह, स्त, मिसा व ज्येष्ठ नागरिकया हकय् निरन्तर रुपं ज्या यात धाःसा भवनया महत्व दइ धयादिल ।

ज्याझ्वलय् येँ मनपा २३ वडाअध्यक्ष मचाराजा महर्जन, वडासदस्य चन्द्रदेवी मानन्धर, दफ्टर सामुदायिक क्लब भवन उपभोँक्ता समितिया अध्यक्ष राकेश शाहीं नं थःथःगु नुगःखँ प्वंकादीगु खः । येँ निर्वाचन क्षेत्र नं ८ स्थानीय पूर्वाधार विकास साझेदार ज्याझ्वः अन्तर्गत २० गू लाख लागतय् दयेकेत्यंगु भवन नितँजाःया जुइ ।