नामाबियां नेपाःयात हाकनं बुकल

येँ (नेपालभाषा टाइम्स)- किपूया टियू मैदानय् नेपाः, नामिबिया व नेदरल्याण्ड्स दथुइ जुयाच्वंगु विश्वकप लिग–२ कासा नेपाः हाकनं नामिबियालिसे पराजित जूगु दु । नामिबियां बुधवाः नेपाःयात निगू विकेटं बुकल । नेपाः थ्व सिरिजय् नामिबियालिसे निगुलिं कासाय् पराजित जूगु खः ।

कासाय् टस बुनाः न्हापां ब्याटिङ याःगु नेपालं ३७.१ ओभरय् १६८ रन दयेकाः अलआउट जूगु खः । नेपाःया निंतिं आसिफ शेखं अर्धशतक प्रहार यासे दकलय् अप्वः ५८ रन दयेकूगु खः । अथेहे कुशल भुर्तेलं १८ रन, कुशल मल्लं ३६ रन, करण केसी व भीम सार्कीं २६ रन दयेकूगु खः । मेपिं कासामिपिंसं धाःसा निगू अंकया रन दयकेमफुत । दिपेन्द्र सिंह ऐरीं ६ रन व सोमपाल कामी ४ रन दयेकूगु खः । नेपाःया कप्तान रोहित पौडेल, देव खनाल व अनिल शाह शून्य रनय् आउट जूगु खः । नामिबियाया बर्नान्ड स्कोल्ट्ज व निकोल लफ्टीं प्यंगू प्यंगू विकेट काःगु खः ।

नेपालं बिउगु १६९ रनया लक्ष्य नामिबियां च्यागू विकेटया क्षतिइ ४० ओभरय् पूवंकूगु खः । नामिबियाया निंतिं जेराल्ड इरामनं ५२ रन व जेजे स्मिथं ३३ रन दयेकूगु खः । नेपाःया निंतिं कुशल भुर्तेलं स्वंगू विकेट काःगु खःसा कुशल मल्ल, दिपेन्द्र सिंह ऐरी, रोहित पौडेल व ललित राजवंशीं छगू छगू विकेट काःगु खः ।
विश्वकप लिग–२या मेगु कासा शुक्रवाः नामिबिया व नेदरल्याण्ड्स दथुइ व अन्तिम कासा आइतवाः नेपाः व नेदरल्याण्ड्स दथुइ जुइ ।