माधव पक्षं मंकाः राजीनामा बीगु !

येँ – प्रधानमन्त्री केपी शर्मा ओलीं विश्वासया मत काइगु जुइवं वय्कःयात असफल यायेगु लागिं विपक्षी पार्टीतय्सं रणनीति दयेकेगु शुरु याःगु दु । विपक्षी पार्टीतय् थ्व रणनीतिया केन्द्रय् आः एमालेया हे वरिष्ठ नेता माधव नेपाल लाःवःगु दु । ओलीयात असफल यायेगु खःसा नेपाल पक्षया सांसदतय्सं मंकाः राजीनामा याये मालीगु छगू विकल्प न्ह्यःने वःगु दुसा आः विपक्षी पार्टीतय्गु ध्यान नं थ्वहे विकल्पय् केन्द्रित जूगु खँ धाःगु दु ।

प्रधानमन्त्री ओलीयात विश्वासया मत मबीगु जक मखु वय्कःया राजीनामा वयेधुंकाः वय्कःयात सरकार दयेकेत गाक्क बहुमत समेत मबीगु खःसा एमाले दुने माधव नेपाल पक्षया करिब २० म्ह सांसदतय्सं मंकाः राजीनामा याये मालीगु खँ पिहां वःगु खः । प्रतिनिधिसभाय् सांसद जुयाच्वंपिं पार्टीया वरिष्ठ नेता माधव नेपाल लगायतया थ्व नेतातय्त प्रम ओलीं अथें नं कारवाही यायेगु धकाः घोषणा याना हे तयेधुंकूगु दु ।

उकिं वय्कःयात विश्वासया मत बियाः कारवाही फयेगु पलेसा वया सिबें न्ह्यः हे राजीनामा बियाः ओलीयात पदमुक्त याये माली धइगु बिचारं थ्व विकल्प न्ह्यःने वःगु खः । थुलि सांसदतय्सं राजीनामा यात धाःसा ओली अल्पमतय् लाः वनी । खतुं माओवादीं बियातःगु समर्थन लित कायेवं ओली आः हे नं अल्पमतय् लायेधुंकूगु दु ।

ओलीयात पदमुक्त यायेगु लागिं माधव नेपाल पक्षया थुलि सांसदतय् राजीनामा वल धाःसा गाः । तर वयां लिपा थःपिनिगु सरकार गठन यायेत धाःसा जसपाया नं समर्थन मदयेक मगाः । जसपाय् नं आः महन्थ ठाकुर–राजेन्द्र महतोया छगू गुट व बाबुराम भट्टराई–उपेन्द्र यादवया मेगु गुट जुयाच्वंगु दु । ठाकुर–महतो गुट ओलीया पक्षय् दु । तर थ्व गुटयाके माक्व सांसद मदु । उकिं ठाकुर–महतो गुट पार्टी हे टुक्रा यानाः पिहां वःसां नं ओलीया पक्षय् बहुमत दइ मखु । बरु भट्टराई–यादव गुटयाके बहुमत दुगु जुयाः थ्व पक्षया १६ म्ह सांसदया समर्थन दत धाःसा ओलीया विकल्पय् मेगु सरकार गठन याये फइ ।

जसपा दुने भट्टराई–यादव गुटं ओली विरुद्धया सरकारयात समर्थन यायेगु धकाः निर्णय हे याना तयेधुंकूगु दु । तर ओलीयात विश्वासया मत मबीगु खःसा व स्वयां नं न्ह्यः माधव नेपाल पक्षया २२ म्ह सांसदतय्सं मंकाः राजीनामा निं बी मालीगु जुइ ।

थुकथं ओलीया सरकार बचे यायेगु ताःचा आः वयाः माधव नेपाल पक्षया ल्हातय् लाः वःगु दु । यदि ओलीं नेपाल पक्षयात यानातःगु कारवाही लित कयाः पार्टीयात जेठ ३ गते स्वयां न्ह्यःया अवस्थाय् यंकेगु खँय् सहमति क्यन धाःसा अझ नं माधव नेपाल पक्षया समर्थन काये फइगु सम्भावना दनि । तर ओलीं आः तक अज्याःगु छुं नं पलाः मल्ह्वंगु जुयाः वय्कः माधव पक्षलिसे थनंनिसें हे कित्ताकाट याना वनेगु मुडय् खने दुगु विश्लेषण यानाहःगु दु ।

सम्बन्धित बुखँ

LEAVE YOUR COMMENTS