नेपालभाषाया सफू व सिरपाः लःल्हात

किपू – लाय्कू शैक्षिक सेवा केन्द्रया ग्वसालय् नेपालभाषाया सफू व सिरपाः लःल्हायेगु ज्याझ्वः जुल । नेपालभाषाया शिक्षक नापं केन्द्रया अध्यक्ष देव आनन्द महर्जनया सभापतित्वय् जूगु ज्याझ्वलय् किपू नगरपालिका वडा नं. ९या वडाअध्यक्षलिसें विद्यालय व्यवस्थापन समितिया अध्यक्ष गंगाराम महजर्न मूपाहांकथं झायादीगु खः ।

ज्याझ्वलय् पाहांकथं कीर्तिपुर माध्यमिक विद्यालयया निमित्त प्रधानाध्यापक लिलाधर अधिकार, नेपालभाषाया सफू बियाः ग्वाहालि यानादीम्ह श्यामशरण मानन्धर, कीतिपुर मा.वि.या पुलांम्ह प्रअ बेखामान महर्जन, गोरखनाथ मा.वि.या प्राथमिक विद्यालय इन्चार्जलिसें नेपालभाषा शिक्षिका विन्दुबाबा जोशी झायादीगु खः ।

ज्याझ्वलय् दाता मानन्धरं थः दिवंगत अबु द्वारिकानारायण मानन्धर व दिवंगत मां हिरादेवी मानन्धरया लुमन्तिइ नेपालभाषाया सफू लःल्हानादीगु खः । वय्कलं छगूनिसें न्यागू तगिंतकया निंतिं नेपालभाषाया सफू कीर्तिपुर मा.वि.या निमित्त प्रअ अधिकारीयात लःल्हानादीगु खः । लिसें वय्कलं झिंनिद्वः तका दां नं आर्थिक ग्वाहालि यानादीगु खः ।

थुकथं हे गोरखनाथ मा.विया नेपालभाषा शिक्षिका जोशीयात छगू व निगू तगिंया नेपालभाषाया सफू लःल्हानादीगु खः ।अथे हे कीर्तिपुर मा.वि.इ तगिं १ निसें ३ तक नेपालभाषा विषय कयाः उत्तीर्ण जुयादीपिंत नेपालभाषा शिक्षक महर्जनं सिरपाः लःल्हानादीगु खःसा प्यंगू व न्यागू तगिंया विद्यार्थीपिंत निमित्त प्रअ अधिकारीं सिरपाः लःल्हानादीगु खः ।उगु ज्याझ्वलय् सूर्यचन्द्र फार्मेसीया बच्चुराम श्रेष्ठ, ब्रम्ह महर्जन, बेखामान महर्जन व विन्द्रा महर्जनं नं आर्थिक ग्वाहालि लःल्हानादीगु खः ।