
येँ – स्वनिगःया साय्मितय् परम्परागत स्वयम्भू भ्वय् (न्हय्सः साय्मि भ्वय्) वंगु शनिवाः थनया भुइख्यलय् तःजिक जुल । स्वनिगःनापं स्वनिगलं पिनेया साय्मित नापं यानाः १४०० यात भ्वय् नकेगु ज्या जूगु खः । केन्द्रीय मानन्धर संघया सभापति मनोजकुमार मानन्धरया सभापतित्वय् जूग ज्याझ्वलय् संघया उपसभापति बद्रीनारायण मानन्धरं लसकुस यानादीगु खः ।
ज्याझ्वलय् थुगु दँय् ज्याः जंक्व यानादीपिं निम्हतिपू व छम्ह याकः मिसालिसें इहिपा यानादीपिं २८ ज्व न्हूतिपूयात नं दसिपौ लःल्हाःगु खः । थुगुसी भ्वय् व्यवस्थापनया भाला भिंद्यः गुथि कालिमातिं याःगु खः । आकिवं भ्वय् व्यवस्थापनया निंतिं श्री पंचमि गुथि किपूयात शनिवाः हे जूगु छगू ज्याझ्वःया दथुइ पाःब्व नं लःल्हाःगु खः।
ज्याझ्वलय् आकिवं भ्वय् व्यवस्थापनया भाला काःगु श्रीपंचमि थुथियात पाःब्वः व थुगुसी भ्वय् व्यवस्थापन याःगु भिंद्यः गुथियात सुभाय् पौ संघया सभापतिं लःल्हानादीगु खः । इहिपा यानादीपिं भौमस्तय् दथुइ न्ह्यइपुक म्युजिकल चियर कासा नं जूगु खःसा उकी मय्जु मंजिल मानन्धर व मय्जु रमिता मानन्धर छसिकथं न्हाप व लिउ लाःगु खःसा वय्कःपिंत संघया सभापतिलिसें दाता गौतम मानन्धर व गजेन्द्र मानन्धरं सिरपाः लःल्हानादीगु खः ।
स्वयम्भू भ्वय्या हे लसताय् हिदान ज्याझ्वः नं जूगु खःसा उकी ४० म्हेसिनं हिदान यानादीगु खः । लिसें संघ अन्तर्गयत मिसा विकास उपसमितिपाखें थीथी हलंज्वलंया ब्वज्या नं यानादीगु खः । स्वयम्भू भ्वजय् भ्वय्या व्यवस्थापन दँय्दसं छगू छगू त्वालं यायेगु याना वयाच्वंगु दुसा बजि, खाय् व धौ, ख्यें व मरि, अय्लाः, थ्वँ, परम्परांनिसें त्वाः, गुथि, खलःपाखें यायेगु व्यवस्था जुया वयाच्वंगु दु ।
LEAVE YOUR COMMENTS