विहीवाःनिसें द्वाल्खाय् बुंगद्यःया जात्रा

येँ(नेपालभाषा टाइम्स)-प्राचीन द्वाल्खा सहरय् वइगु चैत २३ विहीवाःनिसें बुगद्यःया जात्रा शुरु जू वनाच्वंगु दु । येँ जनबहाः द्यःया जात्रा व यलय् बुंगद्यःया जात्रा थें थन नं बुगद्यःया जात्रा यायेगु चलन दया वयाच् वंगु दु । थनया बुंगद्यःया खः (रथ) धाःसा जनबहाः द्यः व यलया बुंगद्यःया खः थें तजाः जुइमखु ।

स्थानीय निकाय भीमेश्वर नगरपालिका २ वडा, स्थानीय सामाजिक संस्था कालिञ्चोक युवा क्लबलिसें मेमेगु संघसंस्थाया सहभागिताय् बुंगद्यःया जात्रा यायेगु तयारी जुयाच्वंगु दु ।

२ वडाअध्यक्ष स्टालिन श्रेष्ठं कनादीकथं वडा समिति, स्थानीय क्लब, सामाजिक संघसंस्था व द्वाल्खावासीया सहभागिताय् द्वाल्खाया बुंगद्यःया जात्रा यायेगु तयारी जुयाच्वंगु दु । वडाअध्यक्ष श्रेष्ठयाकथं द्वाल्खा बुंगद्यःया जात्रा वइगु चैत २३ गते विहीवाःनिसें शुरु जू वनाच्वंगु दु ।

द्वाल्खा बुंगद्यःया जात्राया विशेष आकर्षणया दिं चैत २८ गतेकुन्हु खः । थ्व कुन्हु द्वाल्खाया तँसिचा त्वालं रास्नी धइगु थासय् करिब ६० डिग्री कोणया पाःचाय् द्यःखः साली । थ्व पाःचाय् द्यः सालीगु दिंयात थन जुइगु जात्राया विशेष आकर्षणया दिंकथं कायेगु यानातःगु दु ।

जात्राया झ्वलय् चैत २३ गते ल्हुतिपुन्हिकुन्हु न्हवं याइ । वयांलिपा २४ गते भीमेश्वर नगरपालिका २ वडाया ड्वाकुलुङास्थित पिङ्गल त्वालय् द्यः रथय् बिज्याकी । वयांलिपा २५ गते पिङ्गल त्वालं नक्छे त्वालय्, २६ गते नक्छेँ त्वालं श्यामसुन्दर त्वालय् व २७ गते श्यामसुन्दर त्वादं तँसिचा त्वाःतक द्यः साली ।

२८ गते रास्नीया ६० डिग्रीया कोणं च्वय्या त्वालय् द्यः सालाः २९ गते दुङ्गल त्वाः, ३० गते पिङ्गल त्वालय् साला हयाः बैशाख १ गते डोकलुङ्गा त्वालय् थ्यंकाः रथं द्यः कुहां बिज्याकी ।