स्वीद्वलं मल्याक खँग्वःसहित अनलाइन डिक्सनरी सुरु

येँ (नेपालभाषा टाइम्स) – नेवाः भाय्या स्वीद्वलं मल्याक खँग्वः दुथ्याकाः अनलाइनय् ‘खँग्वःधुकू’ (डिक्सनरी) संचालनय् वःगु दु । आइतवाः छगू भर्चुअल ज्याझ्वः यासें अनलाइन खँग्वःधुकूया सुरुवात याःगु खः ।

नेपालभाषा ह्यःमिपिं संस्कृतिविद् सुभाषराम लाछि, अस्मित मल्ल, ज्ञानकुमार महर्जन व राजेश तण्डुकार जानाः ‘नेपालभाषा अनलाइन डिक्स्नरी’ प्रोजेक्ट न्ह्याकाः थुगु खँग्वःधुकू अनलाइनय् हःगु खः । ज्याझ्वलय् न्ववासें प्राजेक्टया दुजः अस्मित मल्लं थ्व डिक्सनरीइ खँग्वः व उकिया अर्थया लिसें नेवाः नां, धापुखँ मुना नं स्वयेफइगु खँ कनादिल । वय्कःया कथं थ्व खँग्वःधुकुतिइ आःयात ३३ हजार खँग्वःया अर्थ, १२ हजार धापुखँ मुना व द्वःछिं मल्याक नेवाः नां दुथ्याके धुंकूगु दु ।

थ्व खँग्वः धुकू nepalbhasa.org इ वनाः स्वयेफइ । थ्व वेबसाइटय् नेवाः भाय् सयेके न्ह्याःपिनि निंतिं क्वीजया लिसें न्हियान्हिथं ‘वर्ड अफ द डे’ धकाः नोटिफिकेशन कथं नं वइ । थ्व वेबसाइटय छुं खँग्वःया अर्थ स्वयेमाल धाःसा देवनागरी लिपि लिसें रोमन लिपि, प्रचलित नेपाल लिपिं टाइप यानाः सर्च यायेफइ । थथे सर्च यायेबलय् थःम्हं मालागु खँग्वः देवनागरी लिपि लिसें रोमन व प्रचलित लिपिं नं वइ, अथेहे थुकियात गुकथं उच्चारण याइ धयागु नं न्यनेफइसा उगु खँग्वः लिसे सम्बन्धी किपा नं वइगु खँ ज्याझ्वलय् जानकारी बिउगु दु ।

प्रोजेक्टया कार्यकारी निर्देशक सुभाषराम प्रजापतिं आःयात थ्व खँग्वः धुकू चलनचल्तीया भासं न्ह्याकागु जूसां याकनं हे दोलखा व ख्वपया भाय्नं  दुथ्याकेगु खँ धयादिल । अथेहे थुकी दुगु खँग्वःया अर्थयात अंग्रेजीइ ट्रान्स्लेट यायेगु तयारी नं जुयाच्वंगु खँ वय्कलं कनादिल ।

थ्व खँग्वः धुकुतिइ मू कथं नेपालभाषा एकेदेमिं पिथँगु भाजु इन्द्र मालीया ‘नेपालभाषा तःखँग्वः धुकू’ पाखें खँग्वः ल्ह्यया कयातःगु दु । ज्याझ्वलय्न्व वानादिसें संस्कृतविद्, भाषाविद् काशिनाथ तमोट अनलाइनय् तःजिगु खँग्वःगु धुकू दुगु नेवाः भाय्या विकासया निंतिं तसकं महत्वपूर्ण जूगु खँ धयादिसें थुकी आगन्तुक खँग्वःत स्वयां नं नेवाःतय्गु थेत खँग्वः तःसा अझ बांलाइगु खँ धयादिल ।

अनलाइन खँग्वः धुकूया सफ्टवेयर भाजु सुजन जोशी व मय्जु चेतना शाक्यं डेभलप याःगु खःसा तेज महर्जन, राजेन्द्र मानन्धर, विपिन कपाली, अन्जना महर्जन, लुजः घःजुपिंसं थीथी कथं ग्वाहालि याःगु खः ।

सम्बन्धित बुखँ

LEAVE YOUR COMMENTS