नेपालय् सुलाच्वंपिं रोहिंग्या शरणार्थी मालेज्या

येँ-नेपाल प्रहरीं शिविर पिने च्वनाच्वंपिं रोहिंग्या शरणार्थीयात मालेगु ज्या शुरु याःगु दु । प्रहरीया मानव बेचबिखन अनुसन्धान ब्युरोया विशेष पुचलं थीथी थासय् क्वथा बालं कयाः च्वनाच्वंपिं रोहिंग्या शरणार्थी मालेगु ज्या न्ह्याकूगु खः । वर्माय् जातीय हिंसा ब्वलनेवं रोहिंग्या समुदाय बंगलादेश लिसें थीथी देशय् शरणार्थी कथं च्वनाच्वंगु खः ।

नेपालय् धाःसा बंगलादेशय् च्वनाच्वंपिं शरणार्थीयात अमेरिका थ्यंका बी धकाः प्रलोभन क्यनाः मानव तस्करतय्सं नेपाः हयेगु यानाच्वंगु खँ प्रहरीं धाःगु दु । थ्वहे वंगु भदौया स्वंगूगु वालय् झिंप्यम्ह रोहिंग्यातय्त अवैध रुपं नेपालय् दुत हःगु सीवं उमित नेपालय् हःपिं स्वम्हेसित प्रहरीं ज्वंगु खः । ज्वंपिं मानव तस्करय् दुथ्याःपिं निम्ह रोहिंग्या शरणार्थी व छम्ह बंगलादेशी नागरिक खः ।

मानव तस्करतय्सं शरणार्थीयात नेपाः थ्यनेधुंकाः युएनएचसीआरं अमेरिका थ्यंका बी धकाः बंगलादेशया स्थल मार्ग जुयाः भारतं नेपाः हयेगु यानाच्वंगु खँ प्रहरीं धाःगु दु । नेपाः हयाः अमेरिका छ्वयेगु धकाः निगू लाख निसें स्वंगू लाख तक ध्यबा कायेगु यानाच्वंगु खँ सीदुगु दु । वंगु भदौ महिनाय् जक पीम्ह रोहिंग्या शरणार्थीत नेपाः दुहां वयेधुंकूगु जानकारी नं प्रहरीं बिउगु दु ।

उकथं हे येँया चुनिखेलय् झिंखुम्ह व बालाजुइ गुम्ह रोहिंग्या शरणार्थी बालं च्वनाच्वंगु खँ न प्रहरीं धाःगु दु । थ्व स्वयां न्ह्यः कपनया राम मन्दिरय् ३८०म्ह रोहिंग्या शरणार्थीत शिविरय् च्वनाच्वंगु खः । अन शरणार्थीया कारणं यानाः थीथी सामाजिक समस्या ब्वलनेगु यानाच्वंगु दु ।

सम्बन्धित बुखँ

LEAVE YOUR COMMENTS