आः यातायात विभागं लाइसेन्स छापे मयाइगु
येँ (नेपालभाषा टाइम्स)÷सरकारं विद्युतीय सवारी चालक अनुमति पत्र (स्मार्ट लाइसेन्स) छापे यायेगु ज्या बन्द याःगु दु । यातायात विभागं मेसिन व स्मार्ट कार्डया सफ्टवेयरय् समस्या वःगु धासें अत्यावश्यक बाहेकया लाइसेन्स छापे यायेगु बन्द याःगु खः ।
विभागं हे लाइसेन्स छापे यायेगु संविधानया अधिकार सूची व संघीयताया मर्म अःखः जूगुलिं थप लाइसेन्स छापे यायेगु ज्या येँनं मयायेगु खँ धाःगु खः । संविधानं राष्ट्रिय यातायात नीति दयेकेगु अधिकार जक संघीय सरकारयात बियातःगु दुसा लाइसेन्सया जाँच कायेगु, सवारी साधनया कर म्हयेगु अधिकार प्रदेश सरकारयात बियातःगु दु ।
२०७४ लिपा यातायात व्यवस्था विभाग मातहतया तत्कालीन यातायात तथा लाइसेन्स कार्यालय प्रदेश सरकार मातहत हस्तान्तर जुइधुंकूगु दु । लिसें प्रदेशया यातायात मन्त्रालयं सेवा बीगु निंतिं थःथःगु प्रदेशय् लाइसेन्स बीगु ज्याकू नं चायेकेधुंकूगु दु ।
यातायात विभागया महानिर्देशक उद्धवप्रसाद रिजालं सवारी लाइसेन्सया नितिं आवेदन कायेगु, लिखित परीक्षा सञ्चालन यायेगु, बायोमेट्रिक कायेगु, प्रयोगात्मक परीक्षा न्ह्याकेगु व राजश्व एवं शुल्क म्हयेगु ज्या प्रदेश सरकार अन्तर्गतया कार्यालयपाखें जुयाच्वंगु खँ कनादीगु दु ।
संघीयता कार्यान्वयन जूगु उलिमछि दयेधुंकाः नं राजश्व म्हयेगु व लाइसेन्स छापे यायेगु ज्या येँनं जुयाच्वंगु दु, आः थ्व ज्या प्रदेशया जिम्माय् त्वःतेमाःगुलिं विभागं आः लाइसेन्स छापे मयायेगु निर्णय याःगु खः ।
न्हापा थ्व ज्या न्ह्यागु हे कारणं विभागय् केन्द्रिकृत जुयाच्वंगु खःसां आः प्रदेशयात जिम्मा बीगु उचित जूगुलिं येँनं लाइसेन्स छापे यायेगु बन्द यानागु खँ रिजालं स्पष्ट यानादीगु दु । आः विभागं विदेशय् अध्ययन याः वनीपिं, वैदेशिक रोजगारीइ वनीपिं व शान्ति मिसनय् वनीपिं सुरक्षाकर्मी सहित अत्यावश्यक जुयाः विदेश वनीपिंत द्रुत सेवां लाइसेन्स छापे यानाः बीगु ज्या जक विभागं हे याइगु खँ नं वय्कलं कनादीगु दु ।
LEAVE YOUR COMMENTS