शिक्षा समुच्चय ग्रन्थया पितब्वज्या

येँ(नेपालभाषा टाइम्स)- वज्रयान महासंघ नेपालया ग्वसाः व सम्यक दृष्टिया निंतिं पासा परिवारया सह आयोजनाय् जूगु ज्याझ्वलय् ‘आचार्य शान्तिदेवकृत शिक्षा सम्मुचय’नांया ग्रन्थया पितब्वज्या याःगु दु ।

येँ देय्या ज्येष्ठ चक्रेश्वर, वरिष्ठ साहित्यकारलिसें बौद्ध विद्वान फणीन्द्ररत्न वज्राचार्यं त्वाःदेवाय् मत च्याकाः उलेज्या यानादीगु ज्याझ्वलय् वय्कःलिसें अखिल नेपाल भिक्षु महासंघया छ्याञ्जे भिक्षु निग्रोध महास्थविर, बागमति प्रदेशया सांसद शैलेन्द्रमान वज्राचार्यं मंकाःकथं उगु सफूया पितब्वज्या यानादीगु खः ।

भगवान बुद्धया मूर्ति व पं. दिव्यवज्र वज्राचार्यया किपाय् स्वां देछासे न्ह्याःगु ज्याझ्वलय् पं. वज्राचार्यया म्ह्याय्लिसें सफू सम्पादन यानादीम्ह बौद्ध विदुषी सुमति वज्राचार्यं सफूया विषययात कयाः नुगःखँ तयादीगु खः ।

महासंघया नायः राजेन्द्रमान वज्राचार्यं सभापतिया थासं सफूया थीथी पक्षयात कयाः नुगःखँ तयादीगु खःसा सफूया दाता हकमां परिवारपाखें ज्ञानीराजा वज्राचार्यं लसकुस यानादीगु खः । ज्याझ्वलय् थीथी संघसंस्थाया पदाधिकारी, दुजःलिसें आपालं बौद्ध व्यक्तित्वपिनिगु उपस्थिति दुगु खः ।