कोटेश्वर–जडिबुटिइ वैकल्पिक सतक संजाल

ख्वप – कोटेश्वर–लोकन्थली सतकखण्डय् जुइगु ट्राफिक जाम म्हो यायेत वैकल्पिक सतक संचालन यायेगु तयारी जुयाच्वंगु दु ।
लोकन्थलीनिसें जडीबुटी जुयाः कोटेश्वर तक वये वने यायेगु सतकय् न्हिथं थें जुयाच्वनीगु सवारी साधनया चाप म्हो यायेत वैकल्पिक सतक संजाल संचालनय् हयेत्यंगु खः ।

प्रतिनिधिसभा दुजः महेश बस्नेतं न्ह्याकादीगु ‘सुरक्षित ख्वप, जाममुक्त ख्वप’ अभियान अन्तर्गत उगु सतक खण्डय् ट्राफिक जाम व यातायातया चाप म्हो यायेगु योजना कथं तयारी जुयाच्वंगु खः ।

सांसद बस्नेतलिसें ख्वपया प्रमुख जिल्ला अधिकारी नारायाणप्रसाद भट्ट, महानगरीय प्रहरी परिसरया प्रमुख प्रहरी उपरीक्षक हिमालयकुमार श्रेष्ष्ठ, डिभिजन सडक कार्यालयया प्रमुख गुरुप्रसाद अधिकारी, ट्राफिक प्रहरी प्रमुख जगत नेपाली व थीथी सरोकारवाला पुचलं उगु क्षेत्रया अनुगमन लिपा सतक दयेकेगु व ग्राभेल लायेगु ज्या न्ह्याकूगु खः ।

विशेष यानाः येँ–ख्वप वये वने यायेगु मुख्य नाकाकथं दयाच्वंगु कोटेश्वरया ट्राफिक जाम म्हो यायेत पेप्सीकोला–जडीबुटी सतकं चाबही वनेगु सवारी साधन चले यायेगु योजना न्ह्यःने हःगु दु । अथेहे यलय् वनीगु सवारी साधनया निंतिं मनोहरा आँखा अस्पतालं टिकाथली व बालकुमारी वनेगु व उकिया निंतिं सतक मर्मत यायेगु व उगु रुटय् निथाय् बेलिब्रिज तयाः यातायात संचालन यायेगु तयारी जुयाच्वंगु दु ।