मैत्री बुद्ध धुंकाःया बुद्ध सु जुइ ?
हलिमय् तथागत बुद्धपिनिगु जन्म दुर्लभ तर हर्षोल्लास जुयाच्वंगु दु । बुद्ध धर्मया इतिहास दुवाला स्वयेबलय् छम्ह बुद्धया शासनकालया अन्त्य लिपा मेम्ह बुद्धया जन्म जुइगु जुयाच्वंगु दु । बुद्धपिनिगु जन्मं हलिमय् शान्तिया लकस न्ह्याइगु व मनूतय् जीवन सुखमय जुइगु जुयाच्वंगु दु ।
तथागत शाक्यमुनि बुद्धं धयाबिज्याः कथं वसपोलया शासनकालया अन्त लिपा मैत्री बुद्धया जन्म जुइ, मैत्री बुद्धया शासन न्ह्याइ । गुगु छगू कथं स्वर्णिम युग जुयाः सुखद जुयाच्वनी । उगु इलय् हलिमय् स्वःस्वःथाय् शान्तिया स्वां ह्वयाच्वनी । स्वच्छ, स्वस्थ फय् न्ह्यानाः श्रद्धा, भक्तिया सः थ्वयाच्वनी ।
मैत्री बुद्ध स्वयम मैत्री, करुणा, मुदिता व उपेक्षाया सिद्धहस्ती जुयाबिज्याःगु जुयाः संसार व हे कथं भ्यलय् पुनाः न्ह्याः वनाच्वनी । वसपोलया तसकं भय्बिउगु चारित्रिक स्वभाव अले सरल महान व्यक्तित्वं मनूतय् सुख, शान्तिं जीवन हनेगु प्रेरणाया श्रोत जुयाबिइ । धात्थें ला अबलय् वसपोलया उपस्थिति व दर्शन प्रत्येक मनूतय् सौभाग्य जुयाः उमिगु जीवन धन्य जुयाच्वनी ।
अबलय् मैत्री बुद्ध प्रत्येक मनूतय् महान अभिभावक, महान गुरु व धार्मिक आस्थाया केन्द्र जुयाच्वनी । मैत्री बुद्धया पालय् बुद्ध धर्मया स्वरुप न्हापा बुद्धपिनि पालय् गथे खः अथे हे जुयाच्वनी । तर व्यवहारय् गाक्कं पानाच्वनी । मैत्री बुद्धया पालय् वसपोलया संघ तथागत शाक्यमुनि बुद्धया पालय् स्वयां झिदुगं तःधं अले शक्तिशाली जुयाः ब्वलनाच्वनी ।
थ्वहे हुनिं वसपोलया धर्मदेशना हलिमय् हे न्यनाच्वनी । वसपोलया धर्मदेशनाय् मुख्य झिता खँय् बः बियाच्वंगु दइ । व खः, मखुगु खँ मल्हायेगु, खुया मकायेगु, हिंसा मयायेगु, व्यभिचारी मजुइगु, विभाजन जुइगु अभिव्यक्ति वा भाषण मबिइगु, हिंसात्मक वा आक्रोशपूर्ण अभिव्यक्ति वा भाषण मबिइगु, मूर्खतापूर्ण अभिव्यक्ति वा भाषण मबिइगु, इच्छा, आकांक्षां ग्रसित मजुइगु वा लोभ लालच मतयेगु व गलत बिचाः प्रवाह मयायेगु ।
थुकिं प्रत्येकया जीवन सुखी जुयाच्वनी । ल्वापु हिंसा आदि दइमखु । मैत्री बुद्धया पालय् मनूत ध्यानी जुइ । मैत्री बुद्ध स्वयम ध्यानी जुयाबिज्याःम्ह जुयाः ध्यान मनूतय् न्हियान्हिथंया चर्या जुयाबिइ, गुकिं मनूतय् मन स्वच्छ, स्वस्थ जुयाः मनूत ज्ञानी व बुद्धिमान जुयाच्वनी ।
थुबलय् मनूतय्त मगाः, मचाः धइगु छुं मदयाः सम्पन्न व समृद्ध जुयाच्वनी । स्वःस्वःथाय् हलिमय् सुन्दर, शान्त लकस जुयाः थीथी कथंया स्वां ह्वयाः मनोरम जुयाच्वनी । उगु इलय् हलिमय् आः दयाच्वंगु महासागरत चिचीधं जुयाः अन भव्य शहर निर्माण जुयाच्वनी । गन छगू थासं मेगु थासय् मैत्री बुद्ध चाःहिलाः धर्मया नस्वाः ह्वलाःबिज्याइ ।
धाथें अबलय् संसार हे छगू कथं स्वर्ग समान जुयाः झःझःधायाच्वनी । उकिं तथागत शाक्यमुनि बुद्धं धयाबिज्याःगु दु कि वसपोलया पालय् धर्मं गाःपिं मनूत मैत्री बुद्धया पालाय् जन्म जुइगु सौभाग्य प्राप्त जुइ । मैत्री बुद्धया पालय् मनूतय् आयु ताहा जुयाः ७०–८० हजार दँ जुयाच्वनी । अबलय् स्वयम मैत्री बुद्धं ८० हजार दँ हनाबिज्याइगु उल्लेख जुयाच्वंगु दु ।
मेगु कथं धायेगु खःसा मैत्री बुद्धं ८० हजार दँ बुद्धशासन न्ह्याकाबिज्याइ । अथे हे वसपोलया महापरिनिर्वाण लिपा मेगु ८० हजार दँ वसपोलया हे शासन न्ह्यानाच्वनी । थुकथं थ्यंमथ्यं २ लाख दँ मैत्री बुद्धया शासन न्ह्यानाच्वनी । तर मैत्री बुद्धया जन्म गबलय् जुइ ? थ्व स्पष्ट जुयाच्वंगु मदु ।
थुकिया मू हुनि धयागु तथागत शाक्यमुनि बुद्धया शासन कालया अन्त्य लिपा अले मैत्री बुद्ध जन्म जुइ न्ह्यः न्ह्याइगु काल युग अर्थात् हाकुगु न्हि खः । गुकियात बुद्ध शासनया शून्य अवस्था कथं कायेगु यानाच्वंगु दु । थ्व कालयुगया न्हापांगु इलय् मनूतय्के दनावइगु मानवहिनताया कारणं मनूत पशु समान जुइ ।
चिचिधंगु खँय् नं थवंथवय् ल्वापु, हिंसा हत्या तच्वयाः हलिमय् अशान्ति जुयाच्वनी । थीथी ल्वचं मनूत ग्रष्ट जुयाच्वनी । अथे हे थीथी कथं प्राकृतिक प्रकोपया कारणं मनूतय् जीवन दयनिय जुयाः नारकीय जीवन हनेत बाध्य जुयाच्वनी । अबलय् मनूतय् आयु चिहाः जुयाः झिदँ जुइ । तर हिला वनाच्वंगु ई नापं मनूतय् जीवनय् खने दइगु नैराश्यता व विरक्तिपनं उमिगु जीवनय् हिउपाः वइ ।
म्वायेगु मनसाय दनावयाः मैत्री व परोपकारया भावना ब्वलनावइ । थवंथवय् मेलमिलापया लकस न्ह्याना समाज क्वातुयावनी । मनूतय् जीवनय् बुलुहुं सुख, शान्तिं बास याइ । मनूतय् आयु ताहाः जुयावनी । थुकथं जीवन न्ह्याःवनाः कालयुगया अन्त्यपाखे मनूतय् आयु ७०÷८० हजार दँ थ्यनी । अबलय् मैत्री बुद्धया जन्म जुइ । थुकिं कालयुग पूर्णरुपं समाप्त जुइ ।
तर थ्व कालयुग गपाय् हाकः धकाः धाये फयाच्वंगु मदु । गनं थ्व हजार दँ उल्लेख जुयाच्वंगु दुसा गनं थ्व लाखौं लाख दँ जुयाच्वंगु दु । थुकिं यानाः मैत्री बुद्धया जन्म थबलय् जुइ धकाः धाये फयाच्वंगु मदु । तर छगू खँ, कालयुगया सुरुवातया इलय् मनूतय् आयु झिदँ जुयाच्वंगु मैत्री बुद्धया जन्मया इलय् ७०÷८० हजार दँ थ्यनीगु धयागु निश्चय नं कालयुगया अवधि यक्व ताहाः जुइगु अनुमान यायेफु ।
अर्थात् थ्व लाखौं दँ जुइगु सम्भावना दयाच्वंगु खँ बौद्ध विद्वानतय्सं धायेगु यानाच्वंगु दु । थ्व हे कारणं तथागत शाक्यमुनि बुद्धया शासन कालया अन्त्य लिपा मैत्री बुद्धया जन्म व वसपोलया नं शासनकाल पूर्णरुपं समाप्त जुइगु धयागु म्होति नं ३÷४ लख दँ लिपाया भविष्यया खँ जुइगु खनेदु, गुगु तसकं ताःहाःगु ई जुयाच्वंगु दु ।
उगु इलय् अर्थात् उलिमछिं दँ लिपाया भविष्यकालय् मनूतय् जीवन गथे जुइ ? स्वयम थ्व पृथ्वी गुगु मनूतय् निवास जुयाच्वंगु खः उकिया भविष्य गथे जुइ ? थ्व विचार यायेमाःगु खँ जुयाच्वंगु दु । ई नापं पृथ्वीइ हिउपाः वइगु स्वाभाविक प्रक्रिया जुयाच्वंगु दुसा पृथ्वी गुलि गुलि पुलां जुयावनी, उलि उलि हे थीथी कथंया समस्यां ग्रष्ट जुयाच्वनी ।
थुकिं यानाः मनूतय् जीवन संकटय् लानाच्वनी । बुद्ध शासन मनूतय् जीवननाप स्वानाच्वंगु व मनुष्य जीवन नापं पृथ्वीया गतिविधिइ निर्भर जुइगु जुयाच्वंगु दु । पृथ्वीइ खनेदइगु चिचिधंगु हिउपाःया कारणं मनूतय् जीवनय् ततःधंगु हलचल मचे जुइगु जुयाः थुकिं मनूतय् अस्तित्वय् तकं लिच्वः लाकीगु जुयाच्वंगु दु ।
थुकिं बुद्धशासन नं निश्चित रुपं प्रभावित जुयाच्वनी । थ्व हे हुनिं हलिमय् भविष्यय् बुद्ध शासनया उत्थान वा शेषया खँ ल्हायेबलय् मनूतय् जीवननाप स्वापू दुगु पृथ्वीया सम्भावित भविष्यया बारे नं समानान्तर रुपं अध्ययन याये आवश्यक जू । वैज्ञानिकतय् धापू दु कि पृथ्वीइ मनूतय् बास धयागु छुं कालया लागिं जक खः । छन्हु पृथ्वीं मनूतय् जीवन हुयाः वनीतिनि । थ्व पक्का खः । तर थ्व गबलय् जुइ धकाः धाःसा धाये फयाच्वंगु मदु ।
वैज्ञानिकतय्गु अनुसन्धान कथं सौर्यमण्डलय् पृथ्वीया आयु धयागु थ्यंमथ्यं ७.८ अर्ब दँ खः । थुकि ४.५ अर्ब दँ फुइ धुंकल । ल्यं दनिगु धयागु ३.३ अर्ब दँ खः । थुकी नं थ्यंमथ्यं १ अर्ब दँ लिपा भविष्यय् पृथ्वी तसकं क्वानावयाः मानव जीवनया लागिं उपयुक्त मजुया बी । वैज्ञानिकतय्गु धापू कथं सौर्यमण्डलय् खनेदइगु हिउपाःया कारणं पृथ्वी सूर्यनाप सतिनावनीगु जुयाः पृथ्वी तसकं क्वानावइगु खः ।
थ्वहे कारणं १ अर्ब दँ लिपा पृथ्वीइ सूर्यया क्वाःजः आः स्वयां १० प्रतिशत अप्वः जुइ, गुकिं यानाः पृथ्वीया सतहया औसत तापक्रम ४७ डिग्री सेन्टिग्रेड थ्यनी । (FUTURE EARTH WIKIPEDIA) गुगु थौंकन्हय् १५ डिग्री सेल्सियस जुयाच्वंगु दु । थज्याःगु अवस्थाय् पृथ्वीइ तसकं तांन्वइ ।
अथे हे महासागरया लः वाष्पीकरण जुयाः छखे लः सुनावनीसा मेखे घनघोर वाफय् वयाः पृथ्वीया लकस आपतिजनक जुइ । ई फुना वंलिसे तापक्रम झन् झन् अप्वयावनाः थ्यंमथ्यं २.८ अर्ब दँ लिपा पृथ्वीया सतहया औसत तापक्रम धु्रबीय लागाय् तकं १४९ डिग्री सेल्सियस थ्यनाः पृथ्वीया सम्पूर्ण जीवतय् जीवनलीला समाप्त जुइ ।
ई नापं पृथ्वी अझ क्वानावनाः अन्ततः मिग्वारा समान जुइ । वैज्ञानिकतय्सं न्ह्यथं कथं पृथ्वी थथे क्वानाः मनूतय् जीवनय् घात जुइगु धयागु छगू प्राकृतिक प्रक्रिया खः, गुगु ईब्यः कथं खने दयाच्वनी । तर थज्याःगु घातयात छखे तयाः पृथ्वीइ गुगु नं कथंया मेमेगु थीथी कथंया घात जुइगु सम्भावना दयाच्वंगु दु ।
गुकिं यानाः पृथ्वीया सम्पूर्ण जीवनय् जीवन विनाशं त्वपुइगु ग्याःचिकु दयाच्वंगु दु । थज्याःगु घात मध्ये दकलय् ग्यानापुगु छगू घात खः उल्कापिण्डया वर्षा । उल्कापिण्ड मंगल ग्रह व बृहस्पति ग्रहय् दथुइ गुरुत्वाकर्षण शक्तिं उडे जुयाः ग्रहं थें सूर्ययात परिक्रमा यानाच्वनी । तर गुरुत्वाकर्षणय् खने दइगु हिउपाःया कारणं उल्कापिण्ड कुतुं वइबलय् थुकिं खास लिच्वः लाकी मखु ।
तर तःतःधंगु पिण्ड गुगु १० किलोमिटर वा व स्वयां अप्वः व्यास दुगु कुतुं वइबलय् छखे पृथ्वीइ ग्यानापुक कम्पन जुयाः भुखाय् ब्वइसा मेखे थ्व पिण्ड पृथ्वीइ बज्रे जुइबलय् थुकिं करोडौं टन चा, धू आदि अन्तरिक्षय् ब्वयेका लां लां अझ दं दं सूर्यया क्वाजः पनाः पृथ्वीइ खिउँका बिइ । थुकिं पृथ्वीया वायुमण्डलीय तापमान म्हो जुयाः पृथ्वीबासीतय् ज्यान खतराय् लानाच्वनी ।
थज्यागु हे छगू तःधंगु पिण्ड ६.५ करोड दँ न्ह्यः मेक्सिको खाडीइ चिकजुलब धइगु थासय् कुतुं वःगु खः । गुकिं पृथ्वीया सतहया तापमान छक्वलं थहां वनाः १५० डिग्री सेल्सियस थ्यंगु खः । थ्व हे क्वाजलं पुनाः १४ करोड दँया इतिहास दुम्ह डाइनोसरया अस्तित्व लोप जूगु खः । अथे हे थ्व उल्कापिण्ड कुतुं वयाः पृथ्वीया ७५ प्रतिशत आवाडीया जीवनलीला समाप्त जूगु खः (Extinctron event -wikipedia_ ।
उकिं थज्याःगु पिण्ड छगू धुंकाः मेगु नापनापं कुतुं वल धाःसा थुकिं पृथ्वीया सम्पूर्ण प्राणीतय् जीवन समाप्त जुइत यक्व ई काइमखु जुइ ।
थज्याःगु हे मेगु छगू खतरनाक घात खः– ज्वालामुखी बिस्फोटन । वैज्ञानिकतय् अध्ययन कथं पृथ्वीइ शक्तिशाली ज्वलामुखी विस्फोटनया भय दयाच्वंगु दु ।
पृथ्वीया श्रृष्टिया इलय् ज्वालामुखी जुयाः गथे मिज्वाला पिहां वयाः पृथ्वी च्याःगु खः, भविष्यय् नं अथे हे शक्तिशाली ज्वालामुखी मुयाः पृथ्वी च्याइगु ग्याःचिकु दयाच्वंगु दु । थुकिं उल्कापिण्ड कुतुं वइबलय् थें छखे धू, कुँ, फि आदि पृथ्वीया गर्भं पिहां वयाः सर्गः त्वपुयाः खिउँका बिइसा मेखे थुकिं वायुमण्डल दूषित जुयाः मनूतय्त थीथी ल्वचं कयाच्वनी ।
अथेहे ज्वालामुखिं पिहां वइगु मि समान क्वाःगु खनिज पदार्थं पृथ्वीया जमिनयात मरुभूमिइ हिलाबिइ । नापं समुद्रया तःलय् ज्वालामुखि मुल धाःसा थुकिं सुनामि वयाः थीथी देय् हे जलमग्न जुयाबिइ ।थज्याःगु हे मेगु ग्यानापुगु घात जुइगु धइगु समुद्रया सतह क्वानावनीगु खः । मौसमय् खनेदइगु हिउपाःया कारणं पृथ्वीइ वायुमण्डलीय तापक्रम थहां वनाः तसकं तांन्वइगु व सुख्खा मौसम जुइ ।
थज्याःबलय् छखे सर्गतं वा मवया लःया समस्या जुइसा मेखे लःया मुहान सुनावनाः लःया हाहाकार जुइ । दँ दँ अर्थात् ताःहाकःगु ई तकं थज्याःगु अवस्था खने दइबलय् थुकिं पहाडया च्वापु नायावनाः न्हापां ला खुसिबाः वइ । तर लिपा च्वापु मदयावंलिसें खुसि गनाः समुद्रय् लःया मात्रा म्हो जुयावनी ।
थुकिं समुद्रय् जलचरतय् जीवन खतराय् लाइ । थज्याःबलय् पृथ्वीया सतहलय् वाउँगु स्वां, सिमा आदि छुं स्वये मदइसा वायुमण्डल दूषित जुयाः जीवनजन्तु नापं मनूतय् जीवन आक्रान्त जुयाच्वनी । थज्याःगु भयावह स्थितिइ पृथ्वीवासीतय् जीवन मृत्युया म्हुतुइ दुहां वनाच्वनी ।
पृथ्वीइ थज्याःगु हे मेमेगु कथंया थीथी कथंया प्रकोप खनेदयाः स्वयम पृथ्वी व मनुष्य जीवन विनाश जुइगु भय दयाच्वंगु दु । थ्व हे कारणं वैज्ञानिकतय्सं पृथ्वीया आयु यक्व मदये धुंकूगु खँ न्ह्यथंगु दु । उमिगु धापू कथं पृथ्वीया आयु अर्बौं दनि धकाः धयाच्वंसां थुकिं मनूतय् वा जीवतय् बास धयागु छुं लाख दँ जक खः ।
वयां लिपा पृथ्वी मृत अवस्थाय् लाःवनी । अर्थात् ‘मृत पृथ्वी’ जुइ । थथे धयागु जीव मदुगु पृथ्वी खः, गुगु छुं ज्याख्यलय् मदुगु जुइ । पृथ्वीया थज्याःगु सम्भावित भविष्यया कारणं बैज्ञानिकतय्सं पृथ्वीया विकल्प मालेगु ज्या सुरु याये धुंकूगु दु । वैज्ञानिकतय्सं पृथ्वीया आयु छुं लाख जक दनि धयाच्वंबलय् मैत्री बुद्धया शासन कालया अन्त्य नं छुं लाख दँ लिपाया भविष्यया खँ जुयाच्वंगु खनेदु ।
थुकथं स्वयेबलय् गनं थ्व निगू घटना थवंथः स्वानावनीगु जकं मखुला धइगु न्ह्यसः दनाच्वंगु दु । मेगु कथं धायेगु खःसा मैत्री बुद्धया शासनकालया अन्त्य लिपा पृथ्वीइ मनूतय् अस्तित्व समाप्त जुयाः बुद्ध शासन शुन्य अवस्थाय् लाःवनीगु जकं मखुला धइगु न्ह्यसः दनाच्वंगु दु ।
थ्वहे कारणं जक बुद्ध धर्मया ख्यलय् मैत्री बुद्ध धुंकाःया बुद्ध सु जुइ धइगु उदघोष मजूगु खःला ? वा थ्व न्ह्यसःया लिसः लिकुना च्वंगु खःला धइगु मेगु न्ह्यसः दनाच्वंगु दु । तर थ्व यक्व दँ लिपाया भविष्यया खँ जुयाः थ्व न्ह्यसःया लिसः इलं हे जक बिइगु लिसः जुइगु भलसा कायेफु ।
अथवा थ्व न्ह्यसःया लिसः स्वयम मैत्री बुद्धं वसपोलया शासन कालय् बियाबिज्याइगु जुइ । अबलय् वसपोलं न्ह्यानाच्वंगु ई नापं पृथ्वीइ मनुष्य जीवनया सम्भाव्यता व बुद्ध शासनया भविष्य बारे जानकारी बियाबिज्याइगु आशा यायेफु । भवतु सब्ब मंगलम् ।
LEAVE YOUR COMMENTS