डब्लुइएनओया निक्वःगु हलिं नेवाः न्ह्यसःलिसः कासा

येँ(नेपालभाषा टाइम्स)- वल्र्ड नेवाः अर्गनाइजेसन (डब्लुएनओ)या ग्वसालय् निक्वःगु हलिं नेवाः न्ह्यसः लिसः कासा–११४३’ याइगु जूगु दु । डब्लुएनओं थ्व हे वइगु गुंलाथ्व तृतिया शनिवाःनिसें न्ह्याइगु कासाय् ब्वति कायेत इनाय याःगु दु ।

जूम अनलाइन प्रविधिया माध्यमं जुइगु कासाय् नेपाःलिसें विश्वया न्ह्यागु देशय् च्वंपिं जूसां १८ दँ तकयापिं व झिंनिगू तगिं तकया ब्वँमिपिंसं ब्वति काये फइगु डब्लुएनओं धाःगु दु । कासाय् ब्वति कायेत नेपाःया पुचःयात द्वःछि तका व नेपालं पिने च्वंपिंत छगू पुचलं २५ अमेरिकी डलर शुल्क पुलेमाःगु व्यवस्था याःगु दु ।

कासाय् मुक्कं ३२ गू पुचःयात जक दुथ्याकेगु ब्वति काःगु पुचःयात समूह विभाजन यानाः छगू समूहय् प्यंगू पुचः दुथ्याकाः कासा यायेगु ग्वसाः खलकं जानकारी बिउगु दु । थुकथं न्हापांगु चरणय् उत्कृष्ट न्हाप व लिउ लाःगु निगू पुचः निगूगु चरणय् वनीगु, निगूगु चरणय् उत्कृष्ट छगू पुचः स्वंगूगु चरणय् दुहां वनीगु व स्वंगूगु चरणय्् नं उत्कृष्ट जूगु प्रत्येक पुचः दथुइ बिजं कासा (फाइनल) जुइगु डब्लुएनओं जानकारी बिउगु दु ।

कासाय् न्हापयात १००० अमेरिकी डलर, लिउयात ८०० अमेरिकी डलर, लियांलिउयात ६०० अमेरिकी डलर, हःपाःयात ४०० अमेरिकी डलरया सिरपाःया व्यवस्था यानातःगु दु । थुकथं हे प्रत्येक समूह चरणय् विजयी पुचःयात ८० व ब्वति काःगु पुचःयात ४० अमेरिकी डलर सिरपाःकथं बीगु नं ग्वसाः खलकं जानकारी बिउगु दु ।