ख्येँया भाः थहांवन

येँ – नेपाल अण्डा उत्पादक संघं ख्येँ न्हूगु भाः क्वःछिउगु दु । संघया कथं किसानतय्पाखें न्यायेबलय् तग्वःगु ख्येँय भाः प्रतिक्रेट २५० तका व चिग्वःगु ख्येँया भाः १८० प्रतिक्रेट क्वःछिउगु दु । थ्वयां न्ह्यः तग्वःगु प्रतिक्रकेट २०० व चिग्वःगुया १३० तका तोके यानातःगु खः ।
ख्येँया भाः थहां वंगुलिं कृषकतय्त राहत जूगु खँ धाःगु दु ।

संघया अध्यक्ष त्रिलोचन कँडेलं न्हापाया भावय् उत्पादन लागतय् हे द्यापं फयेमालाच्वंगु खँ धासें आःया भाः नं लागत मूल्य स्वयां अझं म्हो जूगु खँ धयादीगु दु । ‘ख्येँया भाः थहाँ कुहां जुयाच्वनी’ धासें अध्यक्ष कँडेलं बजाःया अवस्था स्वयां २५० निसें ३०० तका तक औसत भाः जुयाच्वंगु खँ कनादिल ।

कृषकतय्थासं उपभोक्तायाथाय् तक थ्यनीबलय् न्याथाय् कमिशन नकेमाःगुलिं किसानतय्सं उचित भाः कायेमखनाच्वंगु खँ नं वय्कलं धयादिल । छवाः न्ह्यव तक लागत कथं भाः मवः धासें चितवनय् किसानतय्सं ख्येँया भाः थकायेत आन्दोलन हे याःगु खः । नेपालय् थौंकन्हय् न्हि ४५ लाख ख्येँ उत्पादन जुयाच्वंगु दु ।