पहाड व मधेसया सद्भावया आह्वान यानातःगु नाटक

येँ – पहाड व मधेसयात स्वयेगु दृष्टिकोण हिलाः सद्भाव व एकता कायम यायेत आह्वान यायेगु कथं तयार याःगु नाटक ‘मिता आब कोना चलब’ अनामनगरय् च्वंगु मण्डला थिएटरय् मञ्चन जुयाच्वंगु दु । कलाकार रामभजन कामतं च्वःगु व निर्देशन याःगु थ्व नाटकय् पहाडी व मधेसी नागरिक दथुइ ब्वलनाच्वंगु मतभेद, थुकिया कारण व आपसी सद्भावया निंतिं समुदायपाखें हे यानाच्वंगु कुतःया खँ न्ह्यब्वयातःगु दु ।

वंगु वैशाख २० गते निसें मञ्चन जूगु थ्व नाटक वइगु जेठ ५ गते तक क्यनेगु खँ निर्देशक कामतं धयादीगु दु । ‘निक्वःतक जूगु मधेश आन्दोलनया झ्वलय् पहाडी व मधेसी समुदायदथुइ अन्तरद्वन्द्वं तसकं नकारात्मक लिच्वः लाकल’ निर्देशक कामतं धयादिल, ‘थुकिया कारणं तराईलय् च्वनीपिं मधेसी मूलया व पहाडय् च्वनीपिं मधेसी मूलया नेपाली दथुइ ताःई तक तनाव ब्वलन, तर भावनात्मक व एकताया कारणं थ्व अवस्था ताःई तक धाःसा मजुल ।

जनताय् हाकनं छक्वः एकता कायम जुल, थ्व हे विषयय् नाटकय् क्यनागु दु ।’अथेहे थ्व नाटकय् मधेश आन्दोलन लिपा तराईया नागरिकतय् दथुइ ब्वलंगु मनोविज्ञानयात नं न्ह्यब्वयेगु कुतः यानागु खँ वय्कलं कनादिल । ‘मिता अब कोना चलब’ अर्थात ‘मितज्यू आः गुकथं वनेगु ?’ नाटकय् सामान्य बुँज्या यानाच्वंपिं परिवारयात लाःगु लिच्वःयात जीवन्त शैलीं न्ह्यब्वयातःगु दु ।

पहाडी खस व मिथिला संस्कृतिया संयोजनं नाटकयात अन्तरआञ्चलिक विशेषता बिउगु दु । नाटकय् नेपाली व मैथिली निगुलिं भाय् छ्यलातःगु दु । निर्देशक कामत लिसें सुनिता घिमिरे, कौशिला कामत, मिलन नेपाली, विकास पराजुली, राजेश ठाकुर, भरत कार्की, सञ्जय गुप्ता, आदित्य मिश्रा, अमृता श्रेष्ठ, अमृत स्वाँर व शंकर पोखरेलं नाटक म्हितातःगु दु ।

 

सम्बन्धित बुखँ

LEAVE YOUR COMMENTS