नेवाःतय् भूमि समस्यायात कयाः सहलह

येँ(नेपालभाषा टाइम्स)- नेवाः देय् दबू येँ महानगर समितिया ग्वसालय् स्वनिगःया आदिवासी नेवाःतय् भूमि समस्यात कयाः छगू सहलह मुँज्या जूगु दु । वंगु सोमवाः २३ वडाया ओलम्पस क्लबया भवनय् उगु ज्याझ्वः जूगु खः ।

ज्याझ्वलय् स्रोत व्यक्तिकथं झायादीम्ह राष्ट्रिय भूमि आयोग येँ जिल्लाया अध्यक्ष श्यामकृष्ण प्रजापतिं स्वनिगःया नेवाःतय् भूमि समस्या व अवस्थायात कयाः जानकारी बियादीगु खः । वय्कलं येँ महानगरपालिका दुनेया भूमिहीन, दलित, सुकुम्वासी, अव्यवस्थित बसोबासीया व्यवस्थापन यायेत हे आयोग गठन जूगु जानकारी बियादिसें उकिया निंतिं येँ महानगरपालिकानाप सम्झातौतकं जुइधुंकूगु जानकारी बियादिल ।

सम्झौताकथं येँ महानगरं भूमिहीन, दलित, सुकुम्वासी, अव्यवस्थित बसोबासीया लगत संकलन, वास्ताविकता अध्ययन व छानविन तकं यायेधुंकूगु अवस्थाय् आः उकियात सिफारिस जक याये ल्यं दुगु व थुकिया निंतिं आधिकारिक निकाय जुयाच्वंगु येँ महानगरं धाःसा सम्झौताकथं आतक गुगुं नं प्रक्रिया न्ह्याकूगु मदुनि धयादिल ।
येँ महानगरया भूमिहीनयात भूमिपति दयेकेगु थम्हं चाहना यानाच्वनागु खःसां महानगरपालिकां प्रक्रिया न्ह्याका मबिउगुलिं हे समस्या जुयाच्वंगु धयादिल । सम्झौता जुइधुंकूगु अवस्थाय् महानगरं ज्या मयासे अःखबतं डोजर चले याना बिउगुलिं समाधान जुइगु पलेसा झन् समस्या तच्वःगु वय्कःया धापू दु ।

समस्या समाधान यायेगु स्वयां नं महानगरपालिकां सम्झौता अःखः डोजर चले यानाः आतंक न्यंकेगु व समस्या झन तच्वयेकेत स्वःगु द्वपं नं वय्कलं बियादीगु दु ।
येँ महानगरपालिका २३ वडाअध्यक्ष मचाराजा महर्जनं भूमिहीन स्थानीयवासिन्दायात खँग्वलय् जक तक्यनाः मौका त्वःफिकामदीत व राज्यं छक्वःया निंतिं धकाः भूमिहीनयात भूमिपति दयेकेत योजना हःगु इलय् अलमल जुया मच्वनेत नं इनाप यानादिल ।

देय् दबूया केन्द्रीय न्वकुलिसें स्वनिगः विशेष प्रदेशया इन्चार्ज उमेश स्थापितं सुकुम्वासीया इतिहासयात कुलादिसें भूमिहीन जुयाच्वने माःपिं स्वनिगःवासीं थःपिंत सुकुम्वासी धायेत लज्या चाया च्वनेम्वाः धयादिल ।